الصداقه والمصالح - صالح الضويحي
الصداقه فوق مابعد الصداقه من مصالح
والمصالح ما تغيّر شي من صدق الصداقه
من شرب حتى ارتوى صافي قراح وقال: مالح
مثل من يبني معك من شأن غاياته علاقه
الصداقه صدقها.. صدق الفديع بحب شالح
طاهره ماهزّها كذب الكذوب ولانفاقه
وكل مدرك ماعليه وله...سديد الرأي فالح
يدرك ان مغالط الواقع من العاقل حماقه
يامظاهرنا النظيفه وش تحت بيض المشالح
غير واقعنا المرير اللي وراء زيف اللباقه
لو نذوق الشهد.. قلنا الشهد مر وغيرصالح
لاتعارض مع مصالحنا طعنّا في مذاقه
لو غرسنا الصدق مبدأ وأجتنبنا كل طالح
فيه عشنا اخوان وأكثر من اخوان ومن رفاقه
والمصالح والصداقه.. والصداقه والمصالح
تجتمع بأنكار "حب الذات " من شأن الصداقه