أحلام .. وين احلامنا ؟! - صالح الضويحي
يا احلام وين احلامنا مالقينا
الاّ بقايا اشوي. وأشوي . وأشوي
جينا ورحنا ثم رحنا وجينا
بين الظما واللال والشمس والفي
جينا وحنّا بالزمن ماهقينا
أنه يخلي شي من شي لاشي
نجمع شتات احلامنا مادرينا
أن التعب مكتوب وأن الشقى حي
أطفال كنّا والأمل يحتوينا
ماهمنا الاّ الضحك واللعب والغي
تضيق وإلاّ تتسع ماعلينا
لاذيك تشغلنا ولانعتبر ذي
عن كل شئٍ بالحياة إلتهينا
الاّ الثنين القوت مع أزرق المي
اما لعبنا(مضيم ضاح) وسرينا
والاّ تلينا الذود للبير أبو طي
يا أحلام طلنا بالمنام وصحينا
على نحيب الصوت والجرح والكي
يا أحلام مدري وش بقى في يدينا
الاّ عبارة آخ .. لا آه ياخي
أنا ومسافة خطوتي كم مشينا
ماجالها الأنصاف يسعى ولا لي
أنا وروحي والشقى في حدينا
لا أنا أستطعت أقراء الملامح ولا هي
يا أحلام مدري وش بقى يحترينا
مادام حالي سي وأسوأ من السي