دمعتين عتاب - ضحوي الأسلمي
لقيت اللي ابيها وابتهج قلب تمناها
ضحك من بعد غيبتها فرح فرحة مريضٍ طاب
تلاقينا وحارسنا غرامٍ ذاق فرقاها
كما طفل فقد امه قضى وقته مع الاجناب
يغرد فوقنا القمري فرح في يوم جمعاها
يجر لحونه العذبه مواويل وترد اسراب
يرد الخوخ والرمان يرد التين مااحلاها
ترد زهور وورود وبساتين بها اعناب
غشتنا غيمة الاحساس روينا من طرف ماها
تبل عروقنا العطشى وتنبت بالحشا اعشاب
مطرها صافي هتان نزل للروح واحياها
بعد ماكانت ارض مابها غير الصخر وتراب
مشاعرنا غدت جمره سكوت الشوق يصلاها
جزاء للي صبر وعن الهوى في دنيته ماتاب
توشحها خجل بنت شرفها ساس مبداها
شرفها من شرف ناس حموها ثم غدوا شياب
غنجها فتنةٍ كبرى يهز الكون ممشاها
تعدى حسنها الفتنه زمنا مثلها ماجاب
طويلة قد ورموش وثمين اللبس يزهاها
حلاها غير كل الناس صفاها فاتن جذاب
جلسنا والكلام عيون بها صمت تقواها
تناظرني واناظرها بلا بعد وبليا حجاب
سواليفي بها اللهفه عجزت اقول واقواها
اخاف اتلعثم بكلمه تشك بحبي الغلاب
سكتنا والسكوت اجبر عواطفنا على اقصاها
بديت اجمع كلام قد كتبته من دهر بكتاب
كتبت اني لها والله انا والشعر نفداها
ابيع الناس واشريها شجاع لأ جلها مااهاب
اجيها لو تبي فزعه اذا تنخى انا انصاها
اهين اللي يكدرها اهين الناس اهين اشناب
بديت اتكلم حروفٍ لساني ينطق اصفاها
تناظرني يسابقني كلام ماخطر لااحباب
وفجأه...؟؟؟ قربت تنوي تقول اللي تخفاها
تبيني بالكلام اذوب وانا اللي في هواها ذاب
وفجأه..؟؟ انتظر تنطق...ويرجف قلب اغلاها
وفجأه....؟؟؟ كنّها موتي.... يجيني من يدق الباب
عرفت انه مجرد حلم يجيني بس رؤياها
عجزت اصدق اللي صار وهلت ( دمعتين عتاب )
عتب... للوقت وصروفه وحالي كيف سواها
وعتب..... للحلم يلفيني.... وانا كلي حزن ماغاب