معقولة ! - ضحوي الأسلمي
معقوله انساك وافكر بهجرانك..!!
واحب غيرك واقول اني تناسيتك..!!
واجفاك مره واكون بجد .. خوانك
واكتب على صفحتك (خلاص جافيتك..!!)
اصلا انا بالهوى عايش على شانك
ولاقد عرفت الجفا من يوم حبيتك
قلبي واعرفه حشا مايوم قد خانك
وافي .. وانا وسط قلبي فوق عليتك
ياللي بنيتك غلا ..... وزّينت بنيانك
ياللي تخيرتك من الناس واغليتك
ياللي خدودك قمر والموت باأجفانك
ياللي غرامك سكن من يوم لاقيتك
ياللي لحون القصايد كلها الحانك
فدوة عيونك فديتك يوم غنيتك
ياللي عناويني بدنياي عنوانك
وياللي مع الدم بالشريان ضخيتك
كل ماتبي تطلبه بقول : بإمكانك
لو نك تبي للقمر والله وديتك
لاعاش من زعّلك .. لاعاش من هانك
لو تزعل بذمتي جيتك وراضيتك
تعال عندي ترا الخفاق بلدانك
وانت الزعيم الذي للروح وليتّك
تعال أبي ضحكتك وإترك لي أحزانك
تعال أبي منك تجلس والحشا بيتك
تعال سولف تراني حيل شفقانك
ابيك تامر وانا بقول : لبيتك
ابي ادلل ملك حبك وسلطانك
وأشعل شموع الوله.. مااقول مليتك
أبطرد البرد وادفى داخل احضانك
ابي أسولف دفاك ... وكيف ضميتك ..؟؟
أبطعن الوقت لامن جاب حرمانك
وأشكْره لامن لفيت وقلت لي : جيتك
يعني بصراحه محال يصير نسيانك
لو غبت عني ثواني قمت حنيتك
مايكفي إني اموت..!! اموت بااوطانك
(سعودي ) وقطرات دمي كلها (كويتك )
حتى مع العيد ياقلبي ومن شانك
بكون أنا اول بشر بالعيد هنيتك