يكفي حبيبي ! - ضحوي الأسلمي
يا اجمل حروف الحب واعذب زماني
يكفي ترا والله ماقصدي انساك
ولااخطيت في حقك ولاني بجاني
مار الظروف وغربتي.. يوم انا هناك
خلتني ابعد وانت بعدك كواني
لاتفتكر وتقول : (سافر وخلاك)
في ذمتي ذاك السفر ماعطاني
غير العطش بأقصى عروق تبي ماك
اطلب ولايهمك ترا العمر فاني
من راس راسي للمواطي فداياك
مسْكنك والله بين ذيك المحاني
الضلع مدهالك اليا جيت قهواك
ياسيدي.. ياسيدي .. ياحناني
اجمل هدايا الشوق.. انت وهداياك
والله موتي في غيابك لفاني
واخر نفس بالموت عايش بذ كراك
والله طيفك ماتركني ثواني
واليا تركني جاوب الدمع فرقاك
زولك بوسط الحلم كم دعاني
وكم نطحته قصدي اروى محياك
حبك بحر وانا بحبك مواني
اموت واحيا بين عمقك ومرساك
شفني كتبتك بالقصايد اغاني
لولاك شعري ماتغناك.. لولاك
الشعر في وصفك حشا ماعصاني
كله علشانك علشان مااعصاك
انت الوحيد بدنيتي ماانت ثاني
وانا الوحيد اللي بغاك وتمناك
ضيفك انا.. ودي بعينك مكاني
ياحلو مسيارك وانا من تعناك
ناصيك وحدك بين ربعك وعاني
انت المعزب حظ منهو تنصاك
بهر دلال الشوق حب واماني
وصب الغلا فنجال عطني بيمناك
واقول جعلي ماافقدك ياعساني
دام الغلا منك .. عسا لاعدمناك
وشفيك اميز يارفيع المعاني؟؟
ياللي خذيت الزين من بين ذولاك
هذا انا جيتك وجالك كياني
افتح ضميري يابعد من ترجاك
وشف وشكثر بالقلب حبك رقاني
واصبح بدمي واصبح الدم ينخاك
اقسم بربي مانطق لك لساني
غير الحقيقه.. وش حياتي بلياك ؟؟
ماانساك والله لو خيالك نساني
طبعي كذا لاتفكر اني ابجفاك
يكفي حبيبي ماحصل لي كفاني
يااخر محطاتي انا اموت لرضاك
وياك انا وياك عهد و ضماني
وياك انا وياك لاقلت : وياك
يااعذب حروف الحب واصدق زماني
لوني نسيت الناس ما والله انساك