مرثية قبرك الطاهر - عادل الظفيري
تذكرتك بعد موتك بكيتك وإنكسر رجال
ونثرت بمجلسك حسره وقصيدة وجد لوصالك
أشيل من الحزن حملٍ تثاقل تنقله أجيال
وأنا ما ينفطر قلبي كثر حزني على أمثالك
أخايل طيفك بعيني وأنزلها قدروإجلال
لأنك عايش بقلبي ورب الكعبه لحالك
ثلاث سنين من لحظةرحلت وحال ما من حال
أشوفك بس بأحلامي وتبكيني على فالك
غيابك موتي غيابك يشابه صيف دون ظلال
أدورلك من الذكرى بقايا رسوم لأطلالك
رثيت الطيب من بعدك عسير وصار ماينطال
أحسه مات مع موتك بعد ماغابت أفعالك
أحس الأرض من تحتي تنافض يايبه زلزال
وأقول الحزن مارافق بهالدنياسوى عيالك
بكت سجادتك فقدة جبينك كل ماينهال
بسجودٍ طابع الهامه علامه لطيّب أعمالك
ليامن صوت نجرٍدق أحس بدقته موال
أجيك أركض أحسب إنك تبيني أغسل دلالك
رحلت وكل ماباقي حكايا تنضرب بأمثال
وقصايد كل من حبك حزينه حيل ترثالك
تذكرتك كثرنورٍ يشع بوجهك ويختال
تذكرتك كثر ناسٍ نسوك وكانوارجالك
تذكرتك كثرناسٍ رفعته للنجوم وطال
وأشوفه من بعد موتك تنكّر فزعة عقالك
لك الله مابكاك إلا يتيم وكنت راس المال
بكى لين إنعمت عينه حزن لغياب مرسالك
لك الله مافقدك إلارفيقٍ ظامه الترحال
تحدته الطغاةاللّي بموتك خانواظلالك
لك الله يايبه مابه بعد موتك بقايارجال
أظن المرجله ماتت يتاج الراس برحالك
خذاك الموت لكن الوفاياوالدي لازال
بقلبي وجعله الجلطه إذا هالقلب موفالك
كذا سوت بي الدنيا وكذا سويتني تمثال
لوأدري بدلّتك فرقافلا جرّبت فنجالك