شاعر وبشت - عادل الظفيري
ياصاحبي لوبه فخر جيتك عليّ بشتٍ طويل
وألبس جديد الأقنعه وأقول طوعٍ وإمتثال
لكن أعرفك صاحبي في خبرتك منته قليل
ماتخدعك مظاهرٍغطت خفيّات الحثال
شفني على وضح النقا شاعر ولكنّه ذليل
ولد حموله ماجعل بشت المنافق له مثال
وتدري برفيقك من زمن شاعربه الدنيا تميل
من كثرعثرات الزمن شف حالته مابه جدال
تدري بوضعي هالزمن ماله بهالدنيا مثيل
سؤال جيت بحيرتي وإجابته نفس السؤال
وتدري بزمان الغربله سمّى المثلث مستطيل
وتدري بزمان المرجله قفّى ولاباقي رجال
ولو الزمن على سنع ماصاربه راسٍ وذيل
وعقب المعزه روسنا صارت صفر على الشمال
والروس لامن دحدرت فالخيل تفنى من أصيل
والذيل لامنه إرتكزصارالزمن فيه إختلال
ياصاحبي لوبالحكي ماصرت في هرجي بخيل
كان أكثرالعالم أنا هذّار ما أعطيت المجال
لكنهادورة زمن ماهو بفخر فك الدخيل
وشفايده كثر الفخر مالبّس الحافي نعال
ياصاحبي صعبه ترى يرجع زمان المستحيل
إقبل زمان العولمه مابه حرامٍ من حلال
إكذب عشان المصلحه ولحاجتك خلك هبيل
نافق هل البشت وكذا تنال من فضله ظلال