موت سعد وحلم شيماء - عادل الظفيري
ياسعد
ليش أنت اللي تموت ..
وألف كافر مايموت.
ليش هذا الموت قرش..
ليش هذا الموت حوت ..
لوملاك الموت يدري..
في مماتك..
كم كسر قلب اليتاما..
كم فجع خاطر بناتك ..
كم جرح فينا الشعور.
تنزل الرأفه عليه..
وكان فاتك ..
وكان فاتك.
كان خالف حكمة الله..
كان راح لشخص غيرك ..
مر صوبك ماخذاك .
v
v
v
آه ياكبر المتاهه.
صرت مشرك.
ربي أغفر لي خطاي .
لوتجاوزت بحدودي.
بس بأسأل..
بأسلك في عزتك ..
ليش هو اللي يموت ..
وألف كافر مايموت..
.
كل ماناظر مكانه..
كيف خالي ..
وكل فتره يمر فينا ..
أتشرب ألف حسره ..
وأختزلها بالعيون .
وآتحسر
وآتذكر
وأتساءل
كيف ماتت هالطهاره..
وآتساءل ألف مره..
ليش هو اللي يموت ..
وألف كافر مايموت..
..
ياسعد
جيت المقابر..
بس قبرك ماأدله..
وين صاير ..
كان قصدي بس أسلم ..
وجايبن يمك بشاره..
ودي إنك بس تفرح
ودي إنك بس تفرح
في ثراك
وتفرح الموتي معاك..
ياسعد
شفت شيماء كبرت
شفتها صارت عروس
ياسعد إنت إتذكر؟
حلمها التدريس كان!
غيرت هالحلم لأجلك..
ماتذكر ويش حلمك؟
صارت لعينك طبيبه..
حققت كل أمنياتك..
بس لازالت تحسر
بس تكابر..
لأنها بنت لأكابر..
إنك اللي تموت
بلاوداع تروح فجأه..
وإتساءل..
ليش أنت اللي تموت ؟وألف غيرك مايموت..؟
ومصعب الطفل الصغير
بيوم موتك..صار مؤمن مستخير
قبل يبلغ كان في عقله كبير
ليش تدري؟
لأن أبوه إسمه سعد..!
ومرت سنين لغيابك.
وصار رجال وكبير..
وجيتلك قصدي أبشر..
ياسعد مصعب تزوج.
وأنت غايب..
كان فاقدله حبايب..
كني أسمع صوت قلبه..
يصيح
يصيح ويصيح
داخله كل شئ ضايق..
رغم هالكون الفسيح
بس يكابر
مصعب الحر الجريح
ويتساءل
ويتساءل
ليش أنت اللي تموت؟ وألف كافر مايموت ؟
ياسعد
كانت أمي تنتظرك بكل ليله..
كانت تحس بوجودك..
لأنك أقرب من وجودي..
وأنت آخر من بقاله..
وأنت أقرب من ظلاله..
وأغلا .. أغلا من عياله
والمسا موحش ودامس..
شفتها تبكي عليك..
حست إنك ماتجينا ..
ليش هذا اليوم ليش؟
وقبل ماأسألها سألتني؟
ليش هو اللي يموت ؟ وألف كافر مايموت ..
آه ياهذا الغياب
كم يعذبنا رحيلك؟
كم تكفنا بغيابك؟
بألف خامه من حزن..
ياسعد والحزن كافر
رغم هذا وأنت باقي..
بنبض قلبي
مع أبوي اللي رحل
في نفس دربك
وياكثر من مر عابر.
كان موتك / أسوأ أخبار الحياة..
كان موتك / جرح في عمق الشعور.
كان موتك / يعتبر مأساة بيت
مايشابه جرح موتك
غير موتك
وعام تسعين الكويت..
بس لازلنا نتساءل
ونتساءل
ونتساءل
ليش أنت اللي تموت
وألف كافر مايموت
ياسعد
ياسعد
ياسعد