أبوذيّات - عبدالرحمن الغبين
قَبِلْ تُوْعِدْنِيْ بْبَاكِرْ، وِشْ أَمْسَكْ ؟
وْشَخَلِّيْ مِنْ عَنَا ذِكْرَكْ؟ وِشْ أَمْسِكْ؟
جُرُوحَكْ؟ فُرْقِتَكْ؟ غِيْبَاتْ شَمْسَكْ؟
بِبَاكِرْ، لا تعَشِّمْنِيْ، خَطِيَّةْ.
.
.
جِفَاكْ : رْمَاحْ فِيْ صَدْرِيْ، وفِيْصَلْ !
وِفَاكْ : الوَصْل لَه حِجَّةْ، وفَيْصَلْ.
وبَعَدْ هَالْعُمْر، إذَا إِنْتَهْ وَفِيْ صِلْ.
أَخَافْ آمُوتْ مَـ تْضُمَّكْ يدَيَّهْ !
.
.
على عهدك ثبت قلبي ولا يميل
وإنته لا اتصالك جا ولا e-mail
ياغصن أورق، وأثمر لي، ولي ميل
ذبحني الجوع لوصالك خطيّه
.
.
أحفْر آبار ، ما يَنْجَح ولو بِير !
ومِنْ أَلْعَبْ هَنْد، ما يَرْكَب ولو بَيرْ !!
وتمنيت الربع يوصل والوبير،
عَجَبْ يا حَظْ ما تَرضى عليّه
*لعبة الهند : قريبة من الكونكان، يتم ترتيب الورق بصورة ما تسمى بير.
*عقاب الربع،محمد الوبير : شعراء وصلوا لمرحلة ال48 في شاعر المليون وتم إستبعادهم
.
.
طِرِيْقِيْ وَعرْ، مُوْ أَلْوَاحْ مَرْمَرْ !
وِرِيْقِيْ جَفّ، وَسْط الحَلقْ مُرْ مُرْ،
وإذَا تَقْدَرْ عَلَيّ اتْمُرْ، مُرْ مُرْ ،
لأَنِّيْ بشُوفِتَكْ أَنْسَى الأَذِيَّة.
.
.
أحضنه كل ما مَرْنِي طيفه وأقَبْله،
وأفز إن جابه الطاري وأقُبْ له،
وبعده ما يجي مثله، وقبله،
حصون القلب من قبله عصيّه !
.
.
تِضِل الدرب يَـ الناهِدْ .. وِنَهْدِيـْكـ !
ونَكْتِب شِعر، نَقْرَا لك .. ونِهْدِيـْكـ .
بِعِذْر اللوز يِتْشَبثْ بـِ نَهْدِيـكـ .
يَخَافْ ايطيح، والطيحة قوية .
.
.
نريد الكايد الأغلى، نبي ذاك
أبد مو حامض أو مُر، عْنِبِيْ ذاك !
أمدّ إيدين وأستسقي نبيذك،
ولو مرّه تمر تمطر عليّه .