يامنتهى الهيلا - عبدالرحمن بن ماجد ربيعان
إلى الشاعر :عبدالرحمن بن سعود العطاوي
يامنتهى الهيلا وشيخ العمومي
الحضر واللي بالبوادي بالاجماع
من يوم ذاك حنين لليوم يومي
لك بيرق العليا موريث صعصاع
مستارثينٍ من دريد الختومي
تبصم لكم كل العرب عشرالاصباع
وعلى تغوث اردف محصن علومي
وقول العقيلي شاهد المجد ماضاع
وسلطان تاريخه جديد الوسومي
على طلال من الدول يمه اتباع
في نجد لرضاه الخديوي يسومي
والترك خلت منه في نجد الاطماع
ومسلط غدت عنه القبايل قسومي
اللي قطن في سور ياطايل الباع
وتركي مجدد مجدكم بالسلومي
زادت بابن سلطان في كل الاسناع
يابن ربيعان المورخ فهومي
وأنساه فعل عمروالعزفي ساع
امجادكم عدى عليها العزومي
فعلٍ لبوماجد برت منه الاوجاع
صدق الولاء ومراهنه بالقرومي
دولة معزي يوم بعض العرب ضاع
اولاد روق مزبنين الفحومي
ياعزمنهم له نهارالوغى افزاع
واليوم ياشيخي علام الحلومي
أضغاثها غثّت وبذّت للاسماع
نسمع لنا في كل مجلس هرومي
قامت رعاع الناس تبدي بالارواع
كلٍ بلاشلفا يهد ويهومي
أوباش بالادباش راعي ومرياع
أنا يابن ماجد وكاد محومي
ياعابد الرحمن ودواي الابداع
العفو أنا في جو الاوهام أحومي
بس الفضا مابين شاشه ومذياع
واسلم ودم جعلك بعزٍ تدومي
ياطيرنا اللي خير أساميك بتاع