قرار - عبدالعزيز العبدالله السناني
ذا قرار وطاح بالسله قرار
والنهاية ما يصح إلا الصحيح
كل ليل مظلمٍ تحته نهار
يوم شمس الحق للظلما تزيح
ما نبي لك غير رد الاعتبار
لفتةٍ ينهض بها النمر الجريح
والسحاب اللي سكن تحته غبار
هل وبله وازهرت فلٍّ وشيح
يا ولد صالح ترى هذا اختبار
فزت به بالفعل والرأي الرجيح
واجتمع حولك رجاجيل كثار
موجب إنك للغلا بابك فسيح
جوك ربعك عن يمين وعن يسار
ما وقف دونك بها الموقف شحيح
خابرينك يا ولد صالح فنار
كل عين في شعاعك تستريح
ما يخون اقدام رجلينك مسار
يوم راع الخطوه العرجاء يطيح