صب الهوى - عبدالعزيز العبدالله السناني
صب الهوى لمعذب القلب صبه
فنجال حب من لذيذ المشاريب
فنجال حب كل قلب شرب به
طيب يحدث في فناجيله الطيب
اشقر حمر قلب المعنى يحبه
كنه خضاب في كفوف الرعابيب
اجمع حطبك ونار الاشواق شبه
بين الضلوع إرك الدلال المحاديب
دام المشاعر كلها مستتبه
والليل توه ماغزى راسه الشيب
خل الشمال بكل ضلع مهبه
يصفق هبوبه فوق روس المراقيب
فنجال دافي صار للصدر جبه
كني لبسته من سموم اللواهيب
هذا وقلبي في يمينه لعب به
انشد كفوفه عن جروح معاطيب
ان قلت شاله فوق أثره يذبه
لاله مشاريق ولاله مغاريب
يحق له حب لقى ماتعب به
من دون راس المال جت له مكاسيب
دامه بقلبي من يجيه ويطبه
هو ضيف دايم والمشاعر معازيب
صب الهوى لمعذب القلب صبه
فنجال حب من لذيذ المشاريب