شوارع مدينة - عبدالعزيز محمد المالكي
شاعر تِغرد جوف صدره سكاكين
بَرْد التشرد في شوارع مدينه
أَنْحَتْ على رمل الأماكن ذِرَاعَين
وَاْحطب من أضغاث التمني غبينه
صوتي تلاوة صوت في نبرة آمين
موتي وطن سور المقابر يدينه
صليت في مفرق دعاء المعزين
دافي بلون أَغْمَاضَة الياسمينه
شفني أقول : الليل حائط محبين
شفني ألون ف الفضا لي سكينه
أركض ورى تَكّ المطر يابس العين
وأنفض غبار الفقد عن وجد طينه !!
كان العطش عصفور نبت المساكين
وأمي خشوع السجدتين الحزينه
أعلك سواك أصحاب تبغ ورياحين
في دفتر أوجاع القلم ظل أنينه
الدرب تُربه سلك شائك وتخمين
والبحر نَاسِك في شراع السفينه
شفني أجر أذيال حلمي على وين ؟!
ضايق أجوب الليل وأسكن عرينه
عالق وروحي ف الحطب بين فاسين
شف لي وطن وأغفو بحنطة حنينه
حاصل عذوق الغيم ما جاب وافين
والموت في بحة رجائي غبينه
ما هي غريبة لا أنطفى فيدي اللين
قل للورق شاعرك سافه سنينه