العقل نعمه - عبدالله الظفيري
الزمن في آخره.. واحنا نيام !
والفتن في وقتنا مسترسله
والله اللي كافل البيت الحرام
دون هالعالم بأمره يكفله
و"العقل نعمه" .. ونور ف الظلام
[والعواطف].. آخرتها وَلْوَلَه
ديننا راجع مثل بدر التمام
البلا بالجيل واللي مثّله
يا منادي (للعروبه والوئام) ! !
منطق .. الواقع رفض لايقبله !
العروبه زيف صدّقها عَوَام
ماقروا تاريخنا وش بهذله !
العرب بالمصطلح: حرب وصدام
ماضي وتاريخ اسود يحفله
لين بالدّعوه صدح خير الأنام
لمّهم في دين .. ربي كمّله
ماعمر [إسلامنا] بادر وقام
من دعاوي عرق وإلا قَبْيَلَه
شوف (طارق) / بربري.. ذاك الهُمام
البحر خلْف.. وجيوش مقبله
أحرق السفْن وخياره والمرام
ينتصر.. وإلا الشهاده منزله
شف (صلاح الدين) / كردي.. بالحسام
حرر القدس بعقيده تشعله
قادة الأمه بقوا رمز ووسام
كردي وإلا بربري؟؟ مو مشكله !
قوة الإيمان تفرض هالكلام
وديننا ماساد بس بمرجله
الله أكبر يازمن ماهو حرام؟ !
بعد ذاك العز صرنا مهزله ! !
كل مالديت وجهي بالزحام
أرض مسلوبه.. وناس مقتّله !
أي مسلم يرتجي خير وسلام؟؟
والخيانه بالعدو متغلغله !
كيف هو يفرض عليه الإحترام؟؟دام خيّه أول اللي يخذله !
مانجيد إلاّ نكيل الإتهام
والنتايج بالبشاير ممحله
من دعا للجاهليه كل عام
صام صام ولا لقى قشر بصله !
القضيه هي عقائد بالتمام
عارفين أبعاد هذي المسأله؟؟؟
ياعزيز وياحكيم وياسلام
من لنا غيرك إلهي نسأله؟
ردّنا ياربنا رد الكرام
لك .. وتكفينا زمان نجهله
عجّل بنصر لدينك ما يُضام
والعباد اليوم.. ما منهم دله !
من رضى بالذل .. يبشر بالعدام
مامحى التاريخ شئ سجله !