يا حبيب الورد - عبدالله ذويبان
قال : هاك الورد كله قلت : هاته
و أنت هاك اللي لغيرك ما عطيته
يا حبيب الورد لا تأخذ صفاته
مابقى للورد وصف ما خذيته
جيتني و القلب يكتب في وصاته
و أنتثر قلبي على الطرس و قريته
ليه تزعل منه ؟ يا أدنى دانياته
و أنت منه و كل ما يضما سقيته
أمس لف الحزن قلبي في عباته
و أبتديت أرسم معاه حدود بيته
ما شكيته يوم تخنقني جهاته
بس يوم انه خنق قلبي شكيته
لا تلوم القلب يا ماه و نباته
قل فمان الجرح و الا قل فديته
خل وقتك بين جرحه و أمنياته
و أن بكيته لا تقول انك بكيته
هات جفنك للسهر في مقبلاته
و أفهق انعاسك و لا تطري مبيته
ما بقى للفكر من شرّد بناته
غير شعر كل ما يُكتب محيته
بين همي و أخر الوقت و شتاته
جيت كنك مطلع النور و سريته
و قلت يالله لا تخليني شماته
لا يصير الصدق ذنبي لا جنيته
يا شقيق الطيب بأسماه و سماته
كل حرف لطاري أيامك دعيته
و القصيد بٌيَدٌك محياه و مماته
قلي أكتب و أن بغيت أنسى نسيته
يوم جبت الورد كله قلت : هاته
لا تخليني و كني ما خذيته !!