ياحي من بان - فيصل الرياحي
ياحي من بان للقاف وتبيّن له
وهذا رد على الزميل فهد السلمي ( الكاسر الأول)
ياحي من بان للقاف وتبيّن له
هديته غاليه من سوقها الغالي
شوارد الشعر ناداهن وشامن له
قالن سلام وتحيه يابعد حالي
هذا الصحيح وهذا قولي على حله
منطق فهد مثل ذوب السكر الحالي
وجه لي البيت يومني رفيقن له
يمدح رفيقه وهذا سلم الأبطالي
مدحه يشرف ولو ماني بقدله
ماشفت نفسي كبير ولايورالي
ماندعي بالكمال ولانهرول له
هاذي صفه من صفات الواحد الوالي
ياطيّب الأصل ياراع الوفا كله
أشكرك مأمطر من الأمزان همالي
ياجارنا اللي طلباته يهونن له
على النقا والوفا والمذهب الغالي
يهمنا رضاك ، نتعب له ونبذله
مانملك من العلوم البيض والمالي
وسليم قيفٍ عريب وينعرف دله
والله ونعمٍ بهم في كل الأحوالي
بيت الشهامه يظلل من دخل ظله
وبيت الرخامه خفيف ولاله ظلالي
مواقف سليم معروفه بالأدله
أفعال ماهيب سرد علوم وأقوالي
يالكاسر الأول أنت العرف تحتله
من روس ربعك ولابه شك وجدالي
هذا الكلام الصحيح ، اللي نبرهن له
قالوه كل العرب ، ماقوله لحالي
الرجل ماينطق إلا الصدق ، وأجمله
الصدق له فالعرب تقدير وإجلالي
وأرجو السموحه عن النقص وعن الزله
ياجالب الغاليه في سوقها الغالي
قال الرياحي ، وأخذ قوله وسلم له
على سليم الكرام شيوخ وعيالي