امي - فيصل اللويش
شاعره من قلة الحظ جت يمي
بليلةٍ من سوء حظي كنت ساهر
ليلةٍ زاد المدح وقلّ ذمي
واهتفولي لين اتعبت الحناجر
صفقوا لي لين قال الشعر عمي
صرت عم الشعر وأوطان المهاجر
قرّبت والرمح بالعين متحمي
قالت أغراني قصيدك وانت شاعر
حسنها نوخ كلامي وسط فمي
ارتبكت وقلت عن اذنك بغادر
قالت اصبر .. والتفت وقلت سمي
قالت اقعد بس دقايق قلت حاظر
قالت اقرى كل أحلامي وهمي
قالت اقرى كل شعري والمشاعر
مدت أوراق .. وتيبس كل دمي
في ذمتي ماظل دمٍ للخناجر
واستحت كفي .. وردت وسط كمي
كن أصابعها عيونٍ بس تناظر
قالوا ان الجوع بالوقت متسمي
كافرٍ قلت ان الحيا مليون كافر
قالت اقضب واستحيت وزاد غمي
قالت اقرى قلت لا ماني بقادر
كيف ابقراها وانا انسان امي
ماافك الخط وأشعارك دفاتر