عروق الشعر - فيصل اللويش
لامن زعل دلو القصايد يشده
ولاشد دلو الشعر وش في يديني
ماكنت اعرف ان القصايد بيده
تذبل عروق الشعر وتموت فيني
لامن جلس ساكت ويده بخده
اليا ارتكى هاالخد فوق اليميني
واليا اقضبت يسراه بأطراف قده
زعلان ادري بس بينه وبيني
قدام غيري مايبين بصده
لامن زعل تزعل معاه السنيني
عضعض اصابيعه ولاباح سده
حتى عيونه ماتناظر بعيني
لله دره كم احبه واوده
له في خفوقي من الغلا والحنيني
والند حسنه بان لاجبت نده
يجتاحني يجتاحني يحتويني
لامن طرينا الحسن غصبٍ نعده
دام القمر خده وشمسه جبيني
والعين عين اشقر تفنن بهده
لامن مشى ياقاع لاتزلزليني
من طول مجدوله تعب لايكده
وش له بكد الناعم المستليني
لامال من طوله عجز لايرده
جيده كما الدر النفيس الثميني
ملحه شرب سكره لافاض حده
يوم انتثر يالملح لاتسكريني
لامن زعل أرضي من الحب جده
وأرضي ابوه من الغلا لو يجيني
ولامن رضى منهو بهاالكون قده
خل يتبختر دامه يموت فيني