وش صوت ام كلثوم؟ - فيصل اللويش
وش صوت ام كلثوم والحان وهاب
له قبلةٍ صوته وياخف دمه
وليا ندهني سيد تلعات الأرقاب
ومن زين صوته قلت : وش دين امه؟
لامن جلس غصبٍ لبس عيني اعجاب
ولامن وقف يدري وعرف ليه أخمه
ولامن زعل دمعه نزل حب وعتاب
ولا من رضى عيا الفضا لا يلمه
لا واهنيي مجلسي بين الأهداب
وليا عهد في وسط قلبه وذمه
لاسولف بقلبي سواليفه حراب
في ذمتي كل كلمةٍ منه قمه
مرات أحسه من حلى الحكي كذاب
بلسانه اليا قال أحبك مطمه
له وحشةٍ بين الحنايا ليا غاب
ولا من حظر له شدتين وضمه
كنه ندى الجهمه على أوراق الاعناب
ملحه شرب سكره لا فاض يمه
لا من حكى أسهى وأناظره جذاب
ولا من تنفس كل فله تشمه
قال اعترف وش فيك ساهي ومرتاب
يلعن ابو منهو سرح بك وعمه
تسهى وأنا جنبك ولا تحسب حساب
لاحول من وقض من الصدر همه
مايدري انه غير عن كل الاحباب
يشره وانا ساهي بتقاطيع فمه
مستغربٍ وشلون هالثلج ماذاب
ماذاب ليه وجمرتينٍ تضمه