الهموم - فيصل اللويش
بعض الهموم ضيوف يومٍ وليله
مسيار هم وسجتين وتعاتيب
ليله وصدرك عاجزٍ لا يشيله
وشلون لا صارت همومك معازيب
ماينفع سراجٍ بليا فتيله
وماترجع سنينك ولو تصبغ الشيب
عمر الفقر ماكان عيب وفشيله
ترى القناعه كنز والمرجله طيب
العيب لا عظ البنادم شليله
والباب صكّه في وجيه المواجيب
العيب لامنه ترك هالطويله
وظل يتمرغ بالسفاسف وهو ذيب
العيب لامنه غدى للرذيله
درب ومشوه الناس هذا هو العيب
وايامنا خيلٍ تطارد أصيله
دنيا تقلبنا ببطن الدواليب
من ليلةٍ نرحل وننزل بليله
ضيفان حنّا والليالي معازيب