حروف الحب - فيصل الوعيلي
يالغاليه يااعذب من الليل لاطال
انتي حروف الحب وانتي العظيمه
ي احلى من البسمه على وجه الاطفال
واصدق من الدمعه بعين اليتيمه
واجمل من الجلسه ودله وفنجال
في راس طعسٍ والسماء فيه غيمه
بعين الفقر لاشي احلى من المال
وانتي بعيني مال الاموال قيمه
انتي سحابٍ والمطر فيه همال
انتي جمال الحب نيه سليمه
انتي ترى احلى من السيل لاسال
في عين رحالٍ سكن وسط خيمه
انتي ترى احلى من الصوت موال
موال عاصي يوم غنى ياميمه
رحتي ونا واقف على ذيك الاطلال
رحتي وقلبي زايدٍ فيه ضيمه
ما العن من الدمعه على خد رجال
الا ونين الي حياته سئيمه
ونا ونيني تالي الليل بهبال
هذي حياتي من فراقش سقيمه
مر اتذكر خدش وحبة الخال
ومر اتصبر لان نفسي فهيمه
ومرٍ اجر الصوت ياليل يالال
وارجع على موال ميمه ياميمه