مسموح - فيصل فهد العنزي
مسموح ياوقت فيّ .. وما تبي سوه
أنا رضيت الجروح .. ل خاطر " أحزاني "
" عادي " ويعني ؟ ليا من خابت الهقوه
من قبلها ضاع حلمي و أجمل الواني
عشت العمر ضيف لاخوّه ولا عزوه
وحداني .. وأبقى إلين آموت ( وحداني )
مليت .. هذا الوجود الممتلي .. عنوه
مليت أسولف .. وأرددني - على لساني
من يوم راحت حنان الحب و القوه
راحت معاها الحياة وطاحت أغصاني
لله درك .. خفوق ما صفا - جوه
ولله در " الشعور " اللي .. تبلاني
شّيبت وأقفى زماني .. و العمر - توه
ومن راح وقته .. يموت ومارجع ثاني
أنشهد .. بهالزمان .. إنعدمت الخوه
وما عاد نعرف من المجني على الجاني
ومادام الإحساس فيني مشتعل ضوه
" الشعر صدره وسيع " و يعزف الحاني
عشت العمر ضيف لاخوه ولا عزوه
وحداني .. وأبقى إلين آموت ( وحداني )