أماكنا القديمة - محمد الحويماني
بعض الكلام يحق له يجرح الصمت
والبعض الآخر مايبرر ظهوري
اغيب لكن لا حضرت وتكلمت
داريت شرهة غيبتي في حضوري
أنا الذي عن منّة أنوارهم شمت
حي الظلام أن كان شحوا ب نوري
اما انت ياللي في غيابك تعلمت
آهلّ ضعفي من سحابة غروري
ان قلت أحبك أشعر إني تقدمت
على الزمان اللي (حرمني) سروري
ياأبو جروحي كلها [لو تكرمت]
تشرح لهم "حلمي" و "حملي" و "دوري"
ولا انت يكفيني معك كل ما همت
لا قلت: حورك , قلت: قلبي وحوري
ولا ليا ضاقت علي وتجهمت
ضحكتك تعطيني [منافذ عبوري]
المشكله / دام الشقا وأنت مادمت
إلين كَثْرت في عيوني , قبوري
مريت أماكنّا القديمه وسلمت
مريت لكن مادرت عن مروري
والله ياني في غيابك تعلمت
حتى حضورك , مرتبط به حضوري