تمثال الغدر - محمد الشمّري
هلا باللي تجيبه لي تعوس الحظ والبشرى
هلا بك انت وطعونك هلا بك من كرم رجال
تعودنا نقول ارحب ويحلى لضيفنا سمرى
على ضو السمر ندفا وكلن يقرع الفنجال
هلا بك يوم جيتيني وحان الوقت للنحرا
ابنحر في قدومك خافقن يشكي عذاب الحال
هلا بالجرح لا اقبلتي هلابه لا نوى المسرا
هلا به بكل وقت وحين هلابه لاغدى بالحال
ربيت اشتاق لجروحك بشوق الحب للعذرا
وصرت المذنب الابرا بحكم الوقت والاهوال
كبرت وجرحك الاول نزيفن جاري الذكرى
ياكيف انسى سواتك بي وسنين انقضت غربال
ياكيف انسى ولن انسى عراك الهم والصبرا
ويومك ترخص الشاري على سومة زهيد المال
كذا ربوك يابنيه تذرين الجفا ذرا
تمدين الشبر خطوه تجرين المتر اميال
وانا خابر رداة الحظ ولاني ناكر العسرا
وعارف نيه الدنيا بحال العاشق الخيال
وراضي بمصدفات الوقت واعلم انها قدرا
وكلن من خياش الهم كمل صاعه وغصب اكتال
خذينا قسمنا منك وتبقى بالصدر ذكرى
ومهما دارت الدنيا بتبقى للغدر تمثال
وصرنا لغيرنا مشهد يصور بالعضه عبرا
يوصي صافي النيه يواكب مركب المحتال