يابو نوف - محمد بن عوض بن سرور
والله مدري وين اوجه يابو نوف
كل الدروب مجوده وامحميه
وانا على خبرك معي حزمه احروف
لو تنفجر ماضاع منها شظيه
احلام وآمال وطموحات واظروف
والذيب يقنب والمطيه مطيه
والخوف والله مادخل قلبي الخوف
الا من اللي عالم بالخفيه
والجادل اللي حبها ساكن الجوف
جعلي فدا( ن) لجدودها الواصليه
مثل المها مرت على مدت الشوف
مادونها الا سهله جرهديه
ان وقفت جاها ثمانين ملقوف
وان روحت ضاقت علي الفضيه
اشوفها واصد ماكني اشوف
والعذر ياشرهت سنام وطميه
وادريبها ترزم من الشوق واتشوف
وانا عليها اجرها سامريه
والياس من راسي له اسنين محذوف
وخيط الامل عيت تنوشه يديه
ليت الهوى مثل الوغى شلف واسيوف
والله لصير ( اغنيم ) في الدحمليه