جوهره مانتي مثل كل الجواهر - محمد بن عوض بن سرور
والله اني ذاكر وماني بذاكر
وأكثر اللي فات عمري ماذكرته
اذكر أني كنت أجازف كنت أغامر
وكل دربٍ يتعب الهقوه عبرته
وأذكر أني كنت قبل اكون شاعر
والشعر لو ماشعربي ما شعرته
وأذكر إني كنت اصيد وكنت شاطر
وكم غزالٍ مرني عجل وعثرته
بس عيبي كل عيبي كنت أكابر
ومن يصد بنظرته عني حقرته
ليتني ياليتني يابنت خابر
كان عيبي يوم صادفتك سترته
لين تروى من محاجرك المحاجر
وأن روت رديت للستر وشكرته
إنتي اصلاً شي ماهو شي عابر
كم تمنيته وكم ليله نطرته
ودفترك لا يابعد كل الدفاتر
اعتبرته ليل عشاق وسهرته
شاعره ويعج بك عطر المشاعر
مرهفه وإحساسك المرهف عمرته
جوهره مأنتي مثل كل الجواهر
يا حلو فيك القصيد ليا نشرته
وكانها وصلت لحمران النواظر
كيف ابإذخر شي ما عمري ذخرته
ويكفي إنك ذاكره والوقت ذاكر
وإلا انا ياكثر غيرك ماذكرته