ياعلّ نوٍ تكاشف في مزابيره - محمد بن عوض بن سرور
ياعلّ نوٍ تكاشف في مزابيره
وتسوقه النود من قِبله محاديري
ينثر على دار اخو جوزا شخاتيره
اسبوع والغيث رذراذ وشخاتيري
وإسبوع والصلب كاسيته مخاضيره
وإسبوع وتبرّك إضحيّ المعاشيري
وإسبوع والعشب متشابك نواويره
يعني شهر حسب تصويري وتقديري
ويالله ياللي بيدك الخير والخيره
يارازق الداب وسط الغار بالطيري
تعزّ من عزّنا بإسمه وتقديره
الشيخ نسل الشيوخ أهل الأساطيري
فيصل ولد بندر الفيصل ومن غيره
اللي ليا شار ما أحدٍ غيره يشيري
دويش الأمجاد شيخ الشمل وأميره
من قبل لا تطلع شيوخ الدنانيري
من راس بندر وبندر طيب السيره
هميلعٍ رجع الشهب المدابيري
وحفيد من ترعب البصره طوابيره
ويفني طوابير ويفرق طوابيري
اعظم سلاطين نجد اشهر مشاهيره
الهارف إن كان تقرون التقاريري
يقود حمرا مطير ويبخص مطيره
ومطير فريس ورماه ومناعيري
واليوم هذا الدويش بحسن تدبيره
عليه خطلان الأيادي مساييري
مطير لرضاه من ديره ليا ديره
على الجيوب ويسوقون المظاهيري
ويوم إن كلن يماري في مغاتيره
شوفوا مغاتيرنا يا أهل المغاتيري
وضحٍ وبرهن لو اشبه دواويره
عقود الألماس فصدور الغناديري
وهذا المزاين بيجي مزاينٍ غيره
وباكر تشوفون ويش اللي يبا يصيري
وعقب استوى القاف والطرق لشواعيره
شديت هالطرق من فكري وتفكيري
ومن فضل ربي ومن جوده ومن خيره
إني سعودي ومن هالأرض ومطيري
وإنكان من حب ربعه حلّ تكفيره
عزّالله إني كفرت وحلّ تكفيري
وليا افتخر كل شاعر في جماهيره
اطلق جماهير فالساحه جماهيري