الشعر - محمد بن عوض بن سرور
الشعر عنّزته على راس قبه
جزاه يوم إنه ماعمره عصاني
عقب التعب من قاع غبه لغبه
وجمع الدرر والي عطيت وعطاني
عرضته لصلف الزمان ومهبه
هذا مكانه مثل ماهو مكاني
بس انت ياللي غبت من غير سبه
متى تجي ماقدر فراقك ثواني
تعال طف الواهج اللي يشبه
هم الفراق اللي طواك وطواني
تراي انا ياجرح قلبي وطبه
حتى طموحي ما يشابه زماني
ومن حبني ماهو على شرط احبه
إلا انت بك شيٍ لحبك دعاني
تسكب غلاك مع العروق وتصبه
وتضمك لنبض الخفوق المحاني
حتى تمكن فالثقيل و لعبه
إلا لعب فيني وخربط كياني
والمسلم إن ما خاف فالناس ربه
يبدل الله حاله لحال ثاني
خايف عليك تطيح لك في مغبه
وتصبح تعاني مثل مانيب اعاني
يعني حبيبك طالبك لا تكبه
تكفى إذا ماهو عشانك عشاني