عيضه السفياني - محمد عبدالله الأسمري
أزرق العود .. عودٍ لا اشتعل واحترق
فاحت صدورنا من ريحه الطيبة
والبحر من يعرفه ما يخاف الغرق
والشعر موج والتجديف بالموهبة
قالوا: اللي سبح والريح عكسه شرق
قلت: واللي مع التيار وش مكسبه ؟
وش جديد الكتابة والشعر ما اخترق
سقف فكرٍ تليد يعجّ بالأتربة ؟
الإله الحكيم اللي خلقنا فرق
في اختلاف الوجوه وفي وجوه الشبه
وجه عيضه .. ملامح نرجسيّ الورق
ايتشكل مع أبعاده ويستوعبه
وجه عيضه .. ملامح بارقٍ لو برق
أعشبت به دفاتر فكرنا المجدبة
وجهه الوجه الآخر للسهر والأرق
شعرٍ أعذب من أصدق هالشعر وأكذبه !!
امتطى الفكر صهوة وانفرد وافترق
عن خيول العقول السذج المتعبة
بين أصابعه شيطان التمرد طرق
ألف باب إبتكار وصك باب الشبه
اتفلسف يدينه حبر ولا عرق
فوضوية الأصابع (كفٍ مرتّبة)
صوت عيضه .. يدين السارق اللي سرق
انتباه الجميع بدهشة التجربة !!