أحبابنا .. وسياق التفاصيل - محمد عبدالله الأسمري
مشوار عمر ومر بي مثل ساعة
ساعة ومرت بي على (هيئة أولاد)
فيهم شقى مثل : اللقا والقطاعة
فيهم نقى مثل : اللقا دون ميعاد
يا دهشة الشاعر وصدق انطباعه
يا رعشة العاشق ورا قلب منقاد
عن ألف وجه ووجه يلبس قناعه
كانت ملامحهم : (تهاني بالأعياد)
أحبابنا .. وإن قلتها ينفتح باب
ويشعّ نور وتحتفي بي درايش !
أحبابنا .. وإن قلتها قالوا : أحباب
والذاكرة غرفة لعاقل وطايش !
أحبابنا .. وأسمع صدى صوت مرتاب :
"إنت الوحيد اللي إلى اليوم عايش"
ذولاك مروا بك على هيئة أغراب
مثل القطا، مثل الندى والحشايش
قلب وحكايات أزمنة
نبض وزمان بلا حكي
قولوا لمن يسأل عنه :
(إسأل : حسين المالكي)
قولوا لمن يشكي منه :
(يا صاحبي : لا تشتكي)
الخوف : (قبر الألسنة)
والموت : (عذرك يا ذكي) !
أحبابنا .. مشوار فكرة وفكرة
مشوارها ما هو إتجاه ومسافة
أجمع خطايه من هنا لين .. بكرة
وأفارق خطايه بوقتٍ أخافه
يا لايمي ماني على الدرب مكره
ولا هو غرور ولا بوادر ثقافة
مشوار ضامي كثر ما حب ، يكره
نهر الغلا دام المذلة ضفافه
أحبابنا .. عنوان لينٍ وقسوة
بدون ما أدخل في سياق التفاصيل
وصالنا تمر وفناجيل قهوة
وفراقنا قهوة وهيل وفناجيل !
حزن يتغنى في مواويل حلوة
حزن فراقه في وصال المواويل
نورٍ لمحته قبل عامين توّه
يشعل عيونه في قلوب القناديل !!
الذاكرة صوت ناس وماحدٍ أصغى
وغيابي أقرب من أقرب صوت في نفسي
واقف على بابهم وإن قالوا : (اش تبغى)
أقول : (لا تسألوني ، جابني أمسي)
أحبابنا .. وإحتمالات الجفا تلغى
بعض الحكي ليل وأنتم سالفة شمسي
أحبابنا .. والقلوب البيض لو تطغى
ما شدت وثاق مثلي وأوجبت حبسي
أحبابنا .. والدروب أشقت مشاويري
وقبل أجمع أطرافها وخطاي وأكتبها
ما كنت أفكر سوى وشلون تفكيري
يكتب مسافة دروب كان يشطبها
مدري سألتوا عليّه واحد غيري ؟
ولا حسبتوا الليالي زي ما احسبها ؟
أحبابنا .. ما تبون أصدق معاذيري
تبون قلبي .. وقلبي عندكم ف "أبها"
أحبابنا .. وأسمائكم: تحرج الصمت
وتنفض غبار المكتب وتفتح أدراج
أحبابنا .. وأصواتكم: تجرح الوقت
وتسكت عقارب ساعة الصالة إحراج
أحبابنا .. والأرصفة: تخنق إسفلت
من عقب جلستنا عليها بلا سراج
أحبابنا .. مشهد وسميته: "إشتقت"
ووجيهكم: تنفيذ وإعداد وإخراج