مايخصك - محمد عويضة
جات بعد عامين تسأل : كيف حالك ؟
قلت : طيب بعدها غمّضت عيني
خفت لا تلمح بعيني شخص هالك
أهلكه طول الغياب ومات فيني
قلت : بسأل قالت : إسأل وش سؤالك
قلت : يوم إنك رجعتي لي تبيني ؟
ويوم رحتي ليه خلّيتي خيالك
كلما صديت عنك يبتليني
الله لا يوفق عدوّك وش طرالك
تتركيني جالس أفرك في يديني
رحتي وكان المسا مظلم وحالك
كنت أدوّر فيه عنك صدقيني
ليه صدقتي الكذوب إللي حكى لك ؟
وليه أصلاً مارضيتي تعلميني
قلت لك : وش قال ؟ قلتي : وإنت مالك ؟
روح حد الله مابينك وبيني
جاوبيني شفتي وش سوّا هبالك ؟
وإلا تدرين إسكتي لا تجاوبيني
صدقيني يالجواب إللي في بالك
مايعوّض مافقدته من سنيني
كل هذا وتسأليني كيف حالك
مايخصّك زين يالله فارقيني