اقسى شعور - محمد عويضة
تدرين ويش أقسى شعور يهد حيل الآدمي ؟
لاصار مايملك سبب مقنع لجرحه والفراق
مكسور خاطر كن قلبه تحت ضلعه مرتمي
صار الحزن غامر مساحاته على أوسع نطاق
يابنت أنا داخل على الله ثم على ابوك إفهمي
طاري الفراق الله وكيلك من دواعي الإختناق
لوصار مهما صار مني ياحياتي إتكلمي
ترى العتب ياحلوتي بين الحبايب له مذاق
لو يوم زعّلتك بدون شعور وش له تكتمي
قولي حبيبي صار منك كيت وإن الصدر ضاق
وأنا أوعدك لو كنت أنا الغلطان لأنثرلك دمي
وإن كنتي إنتي المخطية لابد نعقد إتفاق
حطي عيونك في عيوني يوم كامل واحزمي
جفني على جفنك على نفس الوتيرة والسياق
وأصير لك (بشار بن برد) أشعر الناس العمي
في هيئة (إبن الذيب) الأبهق من رفع شان البهاق
وأهديك بيتٍ كلما قلته تلعثم في فمي
حطيه في قلبك وشدي دونه ضلوعك وثاق
((إما غرام صاطع كالشمس أو كالأنجم
أو جعل إبيش النار لو يطري على بالش فراق))