ياظالمة - مساعد الشمراني
ياظالمه زينك بشين السوايا
من وين لك قلب على طول جاير
ماابغى الدوا لاصار جرحك دوايا
باكر على الظالم تدور الدواير
اخر علاجي الكي وانت الكوايا
للحب عبره وانت قربك عباير
لو هو على زينك بنلقى صبايا
المشكله بالحب تعمى البصاير
الصبح واضح والخطايا خطايا
والربح من بعض الاوادم خساير
يانفس قومي عن غرام البدايا
وياقلب قبل تحب شاور وخاير
اولاد ناس ولا تحب الوصايا
كلن يرى نفسه يعادل عشاير
ماكل قلب ينشرى بالهدايا
ولاكل كسر تفيد فيه الجباير
المعطي الله مالخلقه عطايا
لو هي على خلقه سقتنا المراير
عزاي رب يعطي حسب النوايا
يرحم عزيزين الذمم والظماير
ناس تدس الهم بين الحنايا
وناس وربي مادرت ويش صاير
هذاك حظه مثل بيض الثنايا
وهذاك حظه مثل سود الظفاير