يا عين - مطلق النومسي
يا عين حزنك حي .. وأفراحك جماد
إبني على خدي دموعك .. بيت .. بيت
أبا أبكي .. أبا أبكي .. أبا أبكي .. باجتهاد
وأبا أبكي .. أبا أبكي .. بحرقه .. ما حييت
لو البكا ماهو مبلغني .. مراد
بس إن صدري يتّسع لامن بكيت
وأنا على صدري يمين الجرح .. جاد
جودة غصب رضيت وإلا مارضيت
أحيان أبشّر جرح قلبي بالضماد
وأحيان أزيده جرح .. لامني صحيت
صحيت في يوم الأحد .. تال العياد
وليا النحيب .. وهاه حي ؟ لا. لا.. ميت
منهو ؟ وكيف ؟ وليه ؟ مدري ؟ والوكاد ؟
إني بغيت أقوم .. لكن ماقويت
تثنّت عظامي .. وانا عظامي شداد
ولحقن على جسمي معاهن .. وإنثنيت
أفتّح عيوني .. ما شوف إلا السواد
أغمّض .. ألقى في عيوني دانميت
وشلون جابر مات ؟ يارب العباد
أستغفرك ... أغواني الحزن وغويت
الشيخ جابر مات ؟ موتي يا بلاد
الشيخ جابر مات ؟ من يقوى المبيت
كل شي تغيّر بعد موته يا ركاد
حتى الكويت اليوم .. ماهيب الكويت
أشوفها ب منظور دولة قوم عاد
ماباقيِِ منها .. سوى .. ذكرى وصيت
يا سيدي ... مولاي .. يا شيخ الفؤاد
ياخذني الله .. كان عن حزنك .. سليت
أبا أجرح عيوني .. بسكين السهاد
والجرح يصحيني ليامني غفيت
يا شيخ عقبك كيف يهنا لي رقاد
وأنا بموتك ذاب قلبي .. وانتهيت
يا اعدل ولاة الأمر ... وأصفاهم وداد
يا من تحت ظل الكرم .. عشت وربيت
عطاك .. واضح بالقراب وبالبعاد
وأخلاصك .. مبيّن .. ليامنك عطيت
والناس تعطي .. بس تاخذ بازدياد
إلا أنت تعطي ثم تعطي .. وإن خذيت ؟
تاخذ عروق قلوبنا .. على انفراد
تتشرّبك .. حب وغلا .. لين إرتويت
مافيه أحد من فضل خير .. ما استفاد
مثلك يا سيدي .. لا سمعت ولا رأيت
ورغم إنك اللي فوق .. عرش الطيب .. ساد
من زهدك .. إن طرّوك بالمدح .. استحيت
آواه من فرقاك .. وآه من البعاد
والذبح .. من طيفك لا جا يمي وجيت
يا ليت موتك رجل .. وأعلنها جهاد
وأدافع إمن أجلك .. دفاع المستميت
لكن هي الأقدار .. ما عنها حياد
وإلا ترانا نقول .. يا عل ويا ليت
يا مجري الأقدار .. ذو الفضل .. الجواد
يا واسع الرحمة .. يا محيي .. يا مميت
يا من عليك المتكّل والإعتماد
يا سامعِ دعواي .. لامني دعيت
أرسل من جنانك نسانيس البراد
على قبر مولاي ... إلهي بك لجيت
تعبان ..وأتعبني شعور الإضطهاد
وأبا أتحرّر .. وأكتب أصدق مانشيت
إن موت جابر .. يعلن لكل العباد
إن الكويت اليوم .. ماهيب الكويت