يا فاتنة مطلق - مطلق النومسي
يا فاتنة مطلق .. ولا عليك أمر
تقرّبي .. وأدني من العذق خرزه
أبا أنظمك مسباح .. من عذق التمر
صعبة ! أنا أدري ؟ بس أبا أصنع معجزه
يا معجزة عمري .. وتبسيطك عمر
أستبسطه .. وأعيش به .. وأستعجزه
لقيت بك بيض .. المراويح السمر
وفقدت بك .. فوح السموم المفرزه
وأخذت بك .. جود الهبايب للجمر
ودفعت بك ... بخل السنين المعوزه
وأوجزت بك .. سهبة لياليك الحمر
وفصّلت بك ... كل الليال الموجزه
حتي عقدت لبعد ( قربك ) مؤتمر
أنا .. وقلبي ... والهموم المجوزه
لين إتفقنا .. ناخذك ليلة سمر
تبقي على صدر الزمن .. متمركزه
يا أم العيون اللي بصحوتها خمر
وتفقد .. بخمرتها العقول المنجزه
فديت روحك .. جاك شعري منسمر
يستخفي .. بجهلك .. وعرفك يبرزه
وأنا .. وشعري .. والطواريق القمر
متلعوزين .. وقاصدين اللعوزه
لين الثعالب تفتكر .. صمت النمر
قبل النمر .. يغمز ابليس .. ويغمزه
وكان القصايد هم زيدان وعمر
أنا أعتبرها شغلةِِ مو محرزه
لكن فيك أنتي مدى الحكي الثمر
وأنا مدى فخرك .. وصنع المعجزة
تفاخري (بمطلق ) ولا عليك أمر
شاعر قوي باسه .. ومن روس عنزه