تخيلوا لو الحريم بيسوقن - نايف بن عرويل
تخيلوا لو الحريم بيسوقن
ونلقالهن في كل شارع طرايف
تلقا العجايز فالشوارع يدورن
وسيارة الاسعاف ترقب حتايف
وليا تأخرنا دقايق يصيحن
ثم اركبن فوق المواتر ولايف
وقامت تكبسلك بالانوار ياهن
بين اخوياك وصرت محرج وخايف
وتخيلوا لو ذات يوماً يمرن
عليك دوريات والجمس طايف
ويوم اطرحوه يصير موقفك محزن
تلقا العجوز مكلبشه ياحسايف
وتلقا البني في كل جلسه يتكن
طقة بلوت ومعهن الكيف كايف
هذي تبا تحكم وهذي تبا تصن
والبيت ضايع دون طبخ وغرايف
ياللي ذنوبك فوق راسك يحنن
اللي فقلبك طلعته الشفايف
انظارنا من فوق فكرك يشوحن
ونشوف شيٍ ماتشوفه ياهايف
حق المره ياشيخ تلعب على من !
خبلان حنا ولا ويش انت شايف ؟
وين انت عن صوت الارامل ينوحن
وين انت عن حق المره فالوظايف
وين انت عن جملة بناتٍ يضيعن
وين انت ياراع العلوم النصايف
لوهي بيديكم كان قلتوا يغنن
لكن صدمتوا فالجبال النوايف
من دونهن حنا وفقلوبنا هن
الطاهرات الساجدات العفاايف
والمسئله لاصار لحقة شرفهن
يروح فيها يا آل زلفه طوايف
هذا كلامي واسمعه زين واذعن
قلته ولاني من تواليه خايف
قلته واباقف وارفع الصوت واعلن
ارادة الامه على لسان نايف
ماهو تخلف لارفضنا يسوقن
راس التخلف لاتركنا العطايف