فمان الحب - نواف المزيريب
فمان الله يا لولو بحر ماجابه الغطّاس
فمان الله يا أصدق وأبيض قلب حبيته
فمان الله ما قلته وأنا صامد رفيع الراس
فمان الله (مهزوزه) عشانك يومي أطريته
فمان الله في دنياً سعيده كلّها أوناس
هذاك الدرب ينتظرك وأنا دربي تنصّيته
نهاية دربنا باب(ن) تكاثر عنده الحرّاس
نهاية دربنا لغز(ن) رمعته لكن أخطيته
نهاية طيب/ في صفحة وفا/ وختامها نوماس
وأدوّن قصه تجمعنا بكتاب(الصدق)سميته
صحيح (أستأذنك) صعبه ولكن تتبعه (لاباس)
حروفك داخل أعماقي بدم القلب خطّيته
وأنا 00إخترت الفراق المر ورضيت معانق الهوجاس
وخاويت السهر والنوم هاجرته وجافيته
عشانك يابعد عمري / عشانك يابعد هالناس
عشانك يابعد حي الوجود ويابعد ميته
فديتك00 (زهرةٍ) فاحت وفا/ وإستنعش النسناس
فديتك (مهرةٍ) شوفه شفا/ وشلون لو جيته
فديت (الشفتين) اللي يحرسن لمعة الألماس
فديت (الوجنتين) اللي يغار الصبح من ليته
فديت الطول مع خصرٍ تمايل ضامرٍ ميّاس
فديت الزول لو بوصف تعبت أوصف ولا أوفيته
فديت الشامه ورمشٍ طويل وناظرٍ نعاس
وشعر(ن) ضاعت إيديني بسواده يوم فلّيته
فديتك كلّك ولجلك حروفي تتعب القرطاس
فديتك كلّك وكلّي مشاعر لكن أزريته
أجل وشلون أترجم لك مشاعر ما لها مقياس
وشاعر جامعٍ مر الليالي في تناهيته
وأنا لامن عشقت أعشق على وضح النقا نبراس
بدويً لاسمع طاري الخيانه ينتخي صيته
ياليتك طيف فيبالي تلاشي بحضرة الجلاس
وقلبك ماعرف قلبي ياقلبي آآآآه ياليته
زمن قاسي00بشر أقسى00قلوبٍ مابها إحساس
زمن حلّل قتل طفله وطفلٍ لاهي ف/بيته
زمن فيه الوفا كلمه تخط بأبيض الكرّاس
زمن لو نزّل دموعي يسمعني زغاريته
حياتي00دامها شادت بجوفي مملكه لليأس
أبي تقري نهاية درب على شانك تمطّيته
خلاص (أستسمحك) برحل كما حرٍ كفخ قرناس
نصيت الدار يوم الدار نادتني ولبّيته
بقالك كلمتينٍ تحتهن خط وما بين أقواس
(فمان الحب) يا أطهر وأبيض قلب حبيته