ياصغيّر مايكبرّني لقب ! - نواف المزيريب
يالقصايد ثوّري نار النشب
يسّري المعسور والعاسر يسير
حقي اللي شوف عيني و إنسلب
كيف راع الملك يسلبه الأجير ؟
ناري اللي براسها سن اللّهب
تحرقك لو كنت في وسط الغدير
بالشعر معناي لاجادل كسب
وعاقبة من جادله بئس المصير
جاني ..ماجيته ولاهي بالغصب
دق بابي , دق بابي , قلت خير
ياهلا باللي إذا جاد الطلب
يفزع وكنّه خويٍ بالمسير
مايخليني ولا يخون و(وهب
عمره) وأصبح فدائيٍ خطير
مايشكّلني تشكّلته سبب
لين أصبح في حياتي لي خشير
ماكتبته لين أضناني التعب
ولا أذكر إنّه ردني قافٍ عسير
أكتبه بالمدح للي إكتسب
طيبه بيمناه بالفعل الغزير
والعتب للي يجود إبه العتب
للعشير اللي نسى واجب عشير
وإن توازى بشوف مكحول الهدب
إستعنته في هوى الزول النظير
وإن نخيته لإختلط فكري غضب
إنتصب ثم إنشهر سيفٍ شطير
إيه (شاعر) والمشاعر من ذهب
إيه (شاعر) دون إستاذ وشوير
كل حرفٍ أكتبه سوّا العجب
صار قصه وإختلف فيها كثير
يصدق إحساسي إذا قالوا كذب
منهو يسترجي خياله بكل بير !!
ولي معاني تزدحم وقت المهب
يوم مثلك في معانيّه فقير
شف حروفي من جزالتها تشب
تشعل النيران في جوف الحقير
إنتبه ! ثم إنتبه ! ثم إحتسب !
(يالحطيئه) إحذر مقابل ( جرير )
قال منهو مايطولك يالعنب
حامضٍ لنّه عن القمّه قصير
بالختام أهديك بيتٍ من لهب
إقتبسته من سما نظم (( الأمير ))
ياصغير مايكبّر باللقب
غير منهو كان من دونه صغير