ياجدي خليت الحزن عديتي - نوض سدير
ياحزن ياللي قمت في دارك اجول
ارحم معاناتي وإرحم شكاتي
الهم ياجدي له بقلبي هطول
واكبر خسارة غيبتك عن حياتي
العقل حاير والجسم صار معلول
وهلت على فقدك ياجد عبراتي
ياجد كم لك في حياتي من فصول
وياما جمعتني بطيبتك ذكرياتي
من صغري وعيديتي منك أنول
وعيديتي عقبك حزون وشتاتي
آه ٍ ياعيد حزنه يطول ويطول
وآهين ياوقت سلبني هناتي
هذا مكانك..ساعتك ..آه ياحول
ونبرات صوتك جددت لي شقاتي
الله عطاك من الكرم والعطا سيول
والله رفعك وكملك بالصفاتي
منبع عطا وطيبك تسرّج به خيول
وتشهد لك فعول الوفا الماضياتي
يالله ياسامع كل نجوى وكل قول
عند السؤال تعززه بالثباتي
وتفتح له ابواب العفو عرض وطول
ويالله تجيره يامجيب الدعاتي
وياالله عساه بظلك اليوم مشمول
يامنزل عم مع المرسلاتي
واعطه شفاعة خير هادي ومرسول
محمد عليه افضل سلام وصلاتي