إنتمائي - نوض سدير
تزين السوالف من يجي طاري ٍ لسدير
ديار الخزامى والنفل والهوا الهادي
الى جيت ابوصف جوها بعلن التقصير
ولا به كلام يترجم احساسي ومرادي
فلاتقول باريس ٍ ولندن ولا اغادير
ترى ذي سدير الغالية فرحة اعيادي
احبك محبة شوق ٍ وحشمة وتقدير
احبك ويمّك ساقني الوجد والحادي
من يلومني لمن تسميت"نوض سدير"
مادام ان غلاها ينبض بداخل فوادي
يكفيني اني من ديار ٍ اهلها غير
أهل فزعة ٍ وكلهم ناس ٍ أجوادي
ديار ٍ اهلها ما يجي منّهم تقصير
وصوت النجر بالبن تسمع له ارْعادي
إلى جيتهم صبح ٍ أوانك تجي بعصير
تشوف التحايا وجهت لك بتردادي
ديار ٍ أهلها للعرب عندهم تقدير
وعود الكرم للضايف يفوح وينادي
أهلها أهل دين وصلاة ٍ واهل تبكير
لهم في الكرم مدات ٍ كبار وشدادي
احب ارضها اللي كلها ذكريات وخير
اهي دنيتي الخضرا وهي غاية مرادي
تعلقت بك والأمر لله والتدبير
وكلي رجا ارفع هامة اهلي واجدادي
أحبك بكل شبر ٍ حوى موطنك ياسدير
أحبك و يشهد لي على حبك ودادي
وانااستغفر الله عد ماسبحه هالطير
عليم الخفا اللي يعلم بحاضر وغادي