صرت تتشيطن - نوض سدير
عسى الله يهون الفرقا على قلب شقي ٍ ونّ
مع الايام متعني وحبه مات يرثاله
انا بحبي قوية بأس ولا اخضع ولا اتمسكن
ونهيت القلب عن وصلك بجد ٍ واوثق حباله
كذا طبعي وفيّه دوم بلا زيف ٍ ولا اتلوّن
ولا اسمح لحسادي وناس ٍ دوم عذاله
مع المخلوق مااتكبر واحسن بالجميع الظن
واتحدى زمان ٍ جار بعزي واوقف قباله
ولكن من غديت بحال مثل سوسة دمار السن
وايامي معك صارت كآبه وحالتي حاله
تركت الحب من فعلك مادامك صرت تتشيطن
وخله ينفعك حلم ٍ مابين الناس تسعى له
ترى وضع الغضب كايد وفي راسك نفث من جن
فادفن به غضب قلبك مع اللوعة وغرباله
هموم القلب باسبابك لو اوزنها تجي بالطن
ولكني امني القلب واقول الصمت اشواله
انا ماني ضعيفة راي واجيد اسلوب فن الفن
وعندي معتقد وايمان بان الشخص بأفعاله
واخذ مني نصيحة حق بلا كبر ٍ ولابه منّ
ترى للبنت فكر وكيد وروح ٍ نوب محتاله
وكم وحدة لاجل دولار ضحوك وغيرها للين
وكم وحده تهدم صروح لاجل احلام في باله
وفي خبث الطبايع ناس تزيد ودوم تتمكن
وحدد واعرف المعنى مابين الدر وحثاله