ذاب الأمل - نوض سدير
الأمل في غمرة التنهيد ذاب بلامروفه
في زمان ٍ يرسم بخطواته ألوان الكآبة
لو امد اليوم كفي بالعطاء والله حسوفه
يوم انا اشوف الاوادم كنها وحوش بغابة
قلت ابصبر لين احضن الصبح واعانق طيوفه
والزمن وان طال غصب يزين لوحلمي غدابه
النخل شفته تغير كن الاشباح بصفوفه
وشفت انا الصاحب كما اللي صك دون الضيف بابه
دم قلبي مثل وادي واللهب ولع بجوفه
ومن ظروف الوقت عقلي تايه ٍ فاقد صوابه
صرت اشوف الصبح ليل وشمس حلمي جت كسوفه
وضحكتي تاهت خطاها وعيني باحزاني سحابه
وصرت اشوف الصاحب بطعن الغدر يغرز سيوفه
آه ياطعم الندم في عمر اقفى واسفابه
طال صبري لين صبري في الصدر لاقى حتوفه
شيبت عيني ياليلي والعمر باول شبابه
عزتي مصدر شموخي لوجروحي بي شغوفه
شامخه ياحروف نبضي والحزن سيف وعصابه