حزين وغريب .. - سعد الحريص
حزين مثلي ..وانا مثلك حزين وغريب
لاياعسى شمس من مثلك ماهي غاربه
الدرب واحد وأحس أنك بعيد وقريب
بعيد قلبك لو الخطوات متقاربه
ماقلت لي شي لكن كان صمتك رهيب
وكان بعيونك كلام أقراه واحتاربه
لو قلت لي والله ليعثر ردي النفس طيب
تركت لك هالجمل حبله على غاربه
ياذيب يابارز النابـيـن ياذيب
الطير حول على صيدك وثم طاربه
ماهو ذنب الليالي والزمن ياعريب
هذا زمن به المستعربه عـاربه
هذا زمن به الهقوات دايم تخيب
وشلون لاصارت الهقوات متضاربه
من لا نفعته وهو عندك كريم وحبيب
كرهك اذا دارت الدنيا ماهو ضاربه
شيقول مثلي ليا ضاق الكلام الرحيب
في لحيته لا سكت وان قال في شاربه