مازال تشوف - أحمد لهبيل
الغدر ما يجيك من القاصح
القاصح معروف عنده وجه واحد
الغدر يجيك من الرطب راه يتلغو في كلام
تشوف الجلدة بايضة ومن داخل كحل عقي
ول عصروه
قطرة من عصارالرمل صابت خسارة
المداول كانواجدودنا تربط فيه البغال
والبغال زينين ومزينهم بمشية عند الشبعة
وفي الحرت نزاهة
البردعة على ظهرالبغل زاد ليه ترديفة وتات
هريد الناب والسير رواح الليل
الجدود ماتو ،لبغال تنتفو،المداول قليل اللي باقي يعرفهم
*
العار لاتحسبونا بغال
مافهباس حسبونا هبال
وكنشونا في الكنانش حتى تحتاجون
جاي الوقت الرخاء عطاه الله
نغز في كتف اوحملو خنشة
ولبقات غيرالرحى .. زيدها
منيضنش..منيضنش
*
الله الله في الأوراق مقادين
اللي عند راه السي والضعيف يقاصي
ماحرت الكنانش ماحرت الخنافش
ماحرت الموكة يظل نهار معها يتناقش
*
الماء والضوء
انت حر ما فرض عليك احد
اخيي اشري الشمع وهني راسك
الشمع ، حتى الشمع زاد فيه
كتروالأضرحة
ولبغيت تزور
دخل معاك الشمع واخرج مشمع
*
وليني هاذ فضيحة
قالو ستروها
تشوفهم يعجبوك في النظرة
تحاورهم في كلامهم جنة خضرة
الوقفة والمشية مقادة
والمحبة، محبةالفار للقط
مول القلب الحنين
يمضغك مايصرطك
*
العارلاتحسبونا بغال
مافهباس حسبونا هبال
شحال من هبيل ناعس على الدس في الزناق
الهبيل مايقول لك اناهبيل
عفاك سولو شكون هبلو
اسمع ليه
رض لكلامو واذ قال لمرار
تسمع منو خبايا تشيبك في نهار
*
شحال من هبيل في كلام حكمة
اسمع ليه ولغ
وشحال من هبيل يتكلم
حتى يغيب عاد تبان المعنى
قالو شوف الهبيل في حال
يظل نهار يطوف ويحيط في الوط
بين الدشور بعصاتو وينطق بالخضاير
الأرض حمرة وسرابها تتطاير
جاء الأجل وراح
وبعده زهرت واخضارت
*
شحال زق ولغ بوقطب
الناس في كلام تعجب
ال قفض عطيه بالجنب
ريح هايجة
لاتوقف في طريق ولا تقرب ليه عند الجدبة
كان يرقب على الرمل يزق ويناد
يقول ماد رشاشات ماد رشاشات
الناس حين تسمعو تقول هذه خرافة
العين ما تشوف غير لبشاني ولحناش ولعقارب
مات بوقطب
الصحاري رجعت تخصب
المعلي والمدلي والخير من المكركب
الصفر والخضرعلى الأرض بق مكور
الخير فاض واكتر بعدماغبر
الناس تفكرت كلام
*
الهبيل قال حسنو بها قبل مايحسنولها
راح بكلامو وفينك ياالفاهم
تسمع المعاني وتحسبهاخرافة
تقول هذا مصيوب او ضرباه تلافة
*
وشحال من هبيل ماحسبو بيه
كبلوه دروه في قفة ورماوه في الحافة