التبيخ - أحمد لهبيل

جا الوقت
أراك على التعناق والتسلام،،
وفي العشية ،روح للحمام تمسد،
ما تسمع ،غير السي ولد السي،
راك حبيب ولد الحبيب.
زد قرب أنت ديالنا،
حق ربي والطعام.
*
سوقنا سوق...
سوق البيع والشرا
هاالنعاج ،ها لحوالة
مول الشكارة هو الرابح.
وبجنبوا السمسارة،
أصحاب اللسان الطويل.
*
قدامنا أيام مزروبة،
عندها شهر وكان
ومبديا من قبل .
الزرود والدبايح ،في ليالي ،
شهر الولايم والتخمار.
*
سبحان الله قلوبهم رطابت
ولاو يتفقدونا.
يزروا المريض،
واخ مجدام يعنقوه.
التواضع،عند موسم ويذبال.
*
شحال من شمات تمرض،
مد يد وقال يفوز
بقات فيه عادة.
*
أما ش هجلات ،غير شر ليها شربيل،
وهناك الله..
لمديح وتشراق الفوام
يبقاو يعليو حتى يقربوه للسماء..
*
أخوتي راه هم واحد يتقاسم ،
كيف المدينة كيف العروبية..
*
نسولكم ياسيادي العار
أنتم أكبر مني سن وعقل
وانتم اهل العقل
حسبوني هبيل .
واش بصح هادوك اللي لهيه يكابدلناالهم ؟..
وباغين لناالرفاهية كبحالهم..؟
مالكم سكتوا..؟
جاوبوني ..
ياك ما ..؟
خلي الجمل تاش...
*
يا رحيم..ياحنين يا كريم
قلبهم حنين.
بالمحنة ،
مسخاوش يفرقواالكراس
لسقوا بالكولة وبجهد كبير
كاينش هند شادهم...
جحا ،
حجته مسمار.
*
السي ولد السي
يظهر مرة في خمس أعوام
يحسب الكل أولاد خالو والأعمام
ما يحشم ما تغير ليه الألوان
*
الوقت قرب ما بق غير سمن
وعلف..
الشمايت موجودين
الضعاف ضعاف العقل والشخصية
هاالحوالة هاالخرفان.
غير بجوانة وراه يحيح
ول زدتيه بيرا وسخن
عليك ببوق
يحسب راسو في مهرجان
*
كاينشي رحي واقفن في الدرب
ما بغاو نزيدوا القدام
واش خايفن علينا أو منا
*
التقل هازنه وحدهم
شلا أوراق في المحافظ
وشلا محافظ بلا وراق
مساكن الله يكون في العون
الله يرزقهم الصبر
تقل كبير هازنه وصابرن
وباقيين..
باقيين يغرفوا ويعمروا
ويقطعوه البحر
عندهم فاين،
يفرغوا.
*
واحنا نركبوا الألواح
نمشيو نجبوه
العار ،غير يقلونا
*
يتحسروا ويكابد لناالهم
يقولواالأزمة في البلاد
شكون سبابها؟
واش حتى واحد ما فاق
أو عايقن وساكتن
*
زينهم في الجاج نشفوه يلمع
كلامهم معسل والوجه مبرقع
منهم ما تعرفوا مجون أومصقع
*
ملنا حنا ماش خوتهم
أوالكرش ضباغة صباغة
ياك ولاد تسعة شهور
*
ألغالط، الشهور ما مقادينش
راك راقد بكري وفايق معطل
*
مالك على هاد الزربة
إل بغيت الطحين وكان
سير عند فلان
الزيت السكر، موجود
السيد راه كريم ورجل مزيان
*
ومال المرأة تعطلت في الوحم
تفك ضغي
أو تسلف دري من عند الجيران
عليه تنفس.
خود فلوس السبوع
قبل ما تفوت الوجبة
ودير الطم
وهني راسك...