الهبيل - أحمد لهبيل
يا الهبيل نسولك عل حال الدنيا وما يجرى
قلي شفي غليلي راني حيران
يا العاقل هاذ الشي معروف من زمان
أنت سبابها لا تقول با أو جدي أو فلان
بغيتي تطرب عليك واخا تجي في الأهل والجيران
يا الهبيل
مالك هاز حملك على كتافك شمس الصمايم وأنت سيحان
راني هاز الهم في قلبي يا العاقل
سايح نرميه
ما لقيت بحر ولا بر ولا حبيب فيه الصدق يخفيه
لقيت أجساد شخمة ملعجة ولسون معقودة
اش تقول ليه
يا الهبيل
عطشك يسقيه ماءالسواقي او عيون الوديان ؟
شربوكم ماء خافي من الخوابي يا العاقل
عجبكم الحال ونسيتو كلام الخالق
بغيتوهم ورضيتو ولكلامهم سمعتو
*
يترد جوعك يا الهبيل بخبز المقاتي ؟
إيه الزيت والطحين تكاثر عليهم وفا ت وقتو
ثوابهم بلات وحديدهم رشى وكترث النفيات
هداو ليكم هدية مسمومة
ورماو في وطانكم لخبات
*
يا الهبيل
علاش ما تحسن وجهك وتزيان ؟
حسن وجهك انت يا العاقل
يواتيك واجلس مع الأقران
قران الشر باعو الأوطان
شوف وجهك في لمرايا
حكر مزيان
كبر سنك بنترتي خدك صبغتي شعرك
طامع تزيد أعوام
احشم
عرفناك يا الهم تقول لكلام كلو نقام
*
يا الهبيل
آش جاري في ارض فلسطين ولبنان ؟
تسولني بلا ما تحشم ياالملطوم
قول واش هذاك وجهك
مخاوي وراضع من حليب العقرب
فاتح باب الذل وعلى همك تزرب
ما صنتي العهد وتقسم بالحرم والرب
نوض تكعد من قدامي قبل ما ينزل علينا الغضب
*
يا الهبيل
راك سمعتي آش قالو في هاذ الكمشة وضبغوها
لكمشة
كمشة خير ويعلم الله القلوب الصافية فين هي
جاوبني يا العاقل
ما حكاو ليك جدود و لا جدة حكات ليك حكاية
يلاما سمعتي والو خد الكتاب واقرا
تمعن في ما يروى آش داز على الرسول والنبية
قتلوهم عذبوهم في النار رماوهم
بالبهتان قذفوهم
لعدا حاربو الحق بالسر ولعنا
ومزال في طريق الحق واقفين
مرادهم يطفيوه اهل اللعنة
هاذ الكمشة ليها إرادة وقوة متينة
قهرت لعدا في وجوهم صامدة
ديما رابحة الموت شهادة والحياةعز
والقدس تعود ولا بد
*
يا الهبيل
كلام كنسمعوه نصدقو أو نكذبو
تهرسو لينا كفات الميزان ؟
يا العاقل
لهبيل يجاوبك على هاذ السؤال
لاتق في دموع الملعون
تاقو جدودنا وحنو عليهم
بالجنب قبلوهم وللجورة منحوهم
وضعو فيهم التقة وعطفو
مشهب البلاءعودهم يعمي
ويشعلو النار بالفتا يل
يا العاقل
قول جاوبني مكتشوفش ما يجرى
دقوا لينا شواكي الصمت
والخبز فيها خميرة معجنة ..