ما يعجب حال - أحمد لهبيل
ليلة ولدت مو ليلة مظلامة
ليلة مجيه لهذ الدنيا
ليلة ما نبحو فيها كلاب
الرعد والبرق وامطار قوية
طلع النهار والشمس ما باينة
من ودنو قبظته مو
ومصرانتو بدمها مدلية معقودة
قالت ليه نوض تقعد ماعندي ليك
سبوع ولا هذية تعجب
قبل الفجر لبستو توب خشين
ومن صدرها رواتو حليب
وعلى الأرض كركبتو
ومن اهل الغدر نبهتو
*
سارت بيه لمكان وقالت ليه احفر هنا
هنا مدفون بوك وحامل معاه وصية
الوصية انت مولاها
بدا يحفر حفيان
الحر بالغمام السماء مكسية انقام
ترمل والرمل غط ليه العظام
وجد دراع بوه مرفوع وهاز علام
وحجرة منقوشة ما نقشها صبعان
العالم الله من نقشها
وزاطم على ثعبان
*
حار في الأمر وسولو
ضرب ليه موعد في المنام
باش يحكلو القصة بالأوزان
وقف يتأمل سالو دموعو
تلفت يمينو لق ثلت حمامات
بالصوف مكسيات
سبحان الله هذه علامة من العلامات
قادر الله يغير الحال
ويبدل قوم بقوم
قوم الطاغية بقوم في قلوبها رحمة
نظر لشمالو لق عود ابيض
مغطي بالسباني
ولجام نقرة زاه يلمع
*
نادى الميمة ماكان ليها جواب
بق فريد وحيد
بغ ينقص من همو
الدموع جفت
بغ يشكي من يحس بيه
*
سمع صوت ينادي
ياولدي أزرع ما تجني
لا تفرح لثمار الغير
ولا تغر بالبسمة المصنعة
هذا زمان الحساب زمان القياس
زمان القوة زمان فيق من النعاس
*
راه فايق والرمل في عينيه
ما سباب ريح قوية ما سباب حقد جنية
سباب ولاد العم
راهم ما بغاو ليه هناء
في كلامهم ألف ألف معنة
ألف نور في طريقهم
وهو عايش في النقمة
*
حال من الأحوال وكل حال
وحتى حال ما يتحال على حال
سولوها اش قالو
تنين على الفراش مطروحة
قصدوها على حاجتهم
لبسوها زوقوها وصاوها وحدو ليها الكلام
ومحروصة على شفايفها
هاهي مزال عايشة اللى بغ يسول
بينها وبين الروضة غير عشر أقدام
ايه تظل تنبش وتخبش في الأرض بغات تزيد القدام
ما وصلت وما تحقت ليها الأحلام
الأيام قدامها كتبدل من بسمةالى الأحزان
ومن العافية الى الأسقام
*
الحاج مسكين كان ليه كلام
في الجمع ليه صي
وعند الموسم ديما القدام
معروف بالطعام وغروه بمديح الكلام
الحاج مسكين اليوم تبذلت عليه الأيام
الذين غرق فيه حتى الأقدام
المعارف اللي كانو هربو عليه نكروه
نساوه ونساو خناش كوكاو
لبطاط بالأطنان
الفريس يسبقو ليها قبل الأوان
صنادق مطيشة عمر
الدلاح السويهلة والقرعة لديد في الطعام
غير اركب على الحديد واقصد الحاج
خد الحوالة بلا ثمن
ايه الحوالة
صابونا حوالة دارو فينا ما بغاو
مشونا ما بق فينا لا لحم ولا لدام
بق الجلد والعظام
سليق اللسان
الباب للي تدق توزن قبل ما تدخل
وحين تخرج عاود الميزان