التسامح - أحمد لهبيل
فصل الشتا
تكون سماه سحاب حامل
بلمطر، الرعد والبرق
مبشر بخير الصيف
تكون ريح رحمة
لقاح لكل كرمة
زاهرة بالثمار.
*
فصل الربيع زاهي
غدير وشجار
الطيور شادية فرحانة
النحل ناشطة سرحانة
من زهرة لزهرة سقوانة
*
يالعاقل...
خود الحكمة من النحلة
عسلها شفا ورحمة
كون سميح شوف النملة
كد وجد، تضامن وصحبة
*
اجيو قربو نتعاونو
نرفعوا راية لمان
كاس حليب، حب التمر
وميدونة عامرة حنة
نلمو النفايس
نخاويو المراضع
ونسعدوا بطيور الجنة
**
تعالوا لدار لغسيل
نفركو لحالة ؟
نسقلو لقلوب ..
نلبسو ثوب جديد .
نجمعو لكلمة
ونطردو الغمة .
*
نغرسوشجر التين ،ظل وفضل
وعود الرمان، يكبر ويتمر
نكسرو حدود الشر
ونبدو لغدر
نتعانقو قبل لفجر
بالصدق ولوقر
تطلع الشمس علينا،
فرحة موشومة فلعمر
**
فين لعرايس يدهم منقوشة
لعرسان بلخواتم وسرالنخوة
فين لوزاير ،والسلاهم ملبوسة
رشوا ماء الزهر بلعطر ،تزيان الجلسة
لغاو على النكافات والخالات والعمات
لقفاطن مجرورا ،وبنات حاملات هدية ،
مزينتهم بغنا، وشطحة بدوية
في السهول عايشين ،حياة نقية
في لجبال العالية،خلاقهم مرضية
خليونا نعيشوا فلهنا شوية
**
نوصيك ياولدي
لا تقيسني لا تقيس بلادي
لا تقيس جار لا تقيس ولادي
لا تيتم حفاد، لا تفتن عباد
*
ياك ما غسلو مخك بالما لحايل ؟
وعمرو ليك الراس فتايل ؟
رادو بك حماق لفعايل
ما عقتي حتى حرقتي النوايل ؟
*
أنت ما زال في الدنيا جديد
و الأمل بين يديك .
شمر على دراعك وكون صنديد
واجه الزمان، النجاح ماش بعيد
اعزم، كن سيدي كن رشيد
حقق المراد، واجعل ليومك عيد
*
راني نوصيك وصاية، انت خويا
من لحمي ودمي، عزيز علي
غير طبعك
ولا تحرق كبدة مك
عيش مع قرانك ،عزز مكانك
وضع الخير بين عيونك
وطرد حزانك