انت يا مرا - محمد مكار
يا أرض كلها خصبة
محراثها حب وإحساس
زريعتها ورود لمحبة
ماتتقدر بياقوت وماس
فيك أمي
يا ما سهرات ليالي
وانا شابع نعاس
فيك اختي
مقادة رونق حالي
بيا تتعنا وسط الناس
فيك بنتي
الوارثة من خصالي
وهازة ليا الراس
فيك خليلتي
الساكنة دخالي
ومبيتاني عساس
سبحان الخالق فسماه
تفنن في خلقك بقياس
ادم من التراب بداه
وشافك حلم فنعاس
فاق ولقاك حداه
ما خلقتي من الراس
باش ما تكوني لفوق
انت للراجل لباس
معاه فارقة لحقوق
ماخلقتي من الرجل
باش حقك ما ينداس
شانك عالي ما ينزل
ويكون نجمك مرموق
خلقتي من ضلعة القلب
باش تكوني فلحضان
دافية بحنان الحب
وديما ليك الشوق .