هجهوج الحال - محمد مومر

نْكَابَرْ فهْوَاكْ
غْرِيبْ نْسَبَّحْ مْعَ لَفْجَرْ
هْبَالِي وْنِيسِي
سْمَنْ تَلِّيسِي
صَوَّفْ بِينْ اللّْحَمْ والظّْفُرْ
نْسُوَّلْ ظْلامْ اللِّيلْ
عْلَى طَيْفَكْ بْلَجْهَرْ
نَكْتَبْ بْرَيَّة
عْلَى كْفُوفْ الرِّيحْ
بْخَطّْ زْنَاتِي
مَعْگُودْ بالصّْبَرْ
خَاتَمْ الْمَكْتُوبْ
فْصُبْعِي مْدَمَّرْ
رْبَاحِي خْطِيَّة
مَصْبُوغْ بْلُونْ الشّْفُرْ
طَحْتْ بِينْ كْتَافِي
تْلَفْ خْيَالِي فالظْهَرْ
غَنَّى سَعْدِي
ومَا طْرَبْ عْرُوقْ الدَمّْ لَحْمَرْ
صَاحَبْتْ عَيْنِي
عَ لَفْرَاقْ والنُّومْ جْفَرْ
كْتَابْ لَهْوَى
تَلْفُو حْرُوفُو عَلْ السّْطَرْ
غْرَامْ لَعْشِيَّة
كْسَانِي عَلَّة
وقَلَّةْ النّْظَرْ
غُرْبَةْ النّْهَارْ
خَطْوَاتْ مْزَاحْمَة غَادَة وتَعْثَرْ
الْحَيْطْ للِّي نْتَكَّا عْلِيهْ
يَكْذَبْ عْلِيَّ ويَتْقَشَّرْ
شَاوَرْتْ حْمَاقِي
وضَوْ الشَّمْعَة يَغْمَزْ فالسَّرْ
نَادِيتَكْ فْلَخْفَا
طَلْقِي سْرَاحِي..
وكْبَالِي لَمْسَمَّرْ
كَمَّدْتْ مْحَانِي
بصْبَرْ النَّمْلَة عْلِيهْ مَا نَقْدَرْ
طْوَيْتْ الضَّحْكَة
طَيَّةْ فْرَاشْ صُحْبَةْ لَغْدَرْ
خَلِّيكْ.. خَلِّيكْ
كْلامْ السُّولُوفَانْ
مَا يَنْفَعْ ما يْضُرّْ
مَا يَمْشَطْ الرَّاسْ
مَا يَفْلَگْ مَا يَضْفَرْ
مَا يْسَوَّكْ سْنَانْ مَا يْعَكَّرْ
مَا يْسَخَّنْ عْظَامْ
مَا يْدَفِّي عَلْ السّْمَرْ
مَا يْحَزَّمْ مَا يْصَبَّطْ
مَا يَنْهِي عَلْ الْمُنْكَرْ
مَا يْسُوَّلْ كِيفْ بْقِيتْ
مَا يْوَاسِي إلَى غَابْ الزّْهَرْ
خَوْفي عْليكْ
كيفْ مَا خَافَتْ الطْيورْ
مَنْ النْسَرْ
خَوْفِي عْلِيكْ
كِيفْ مَا لاحَتْ
العَاگْرَة حْزَامْ لُعْگُرْ
خَوْفِي عْلِيكْ
كِيفْ مَا الثَوْرْ الْعِيَّافْ
مَنْ الْمَرْجَة يُوْرَدْ
مَاهْ زْفَرْ
خَوْفِي عْلِيكْ
كِيفْ مَا بْكَاتْ شَمْسْ لَعْشِيَّة
عْلَى جْنَابْ لَبْحَرْ
تُوبِي
وطُوفِي
كِيفْ مَا طَافُو الْحُجَّاجْ عْلَى مَكَّة
ورَجْمُو الشِّيطَانْ بْلَحْجَرْ
رُدِّي بَالَكْ
خلِّي بَالَكْ يَحْظِي سْرَارَكْ
بالْخَطْوَة يْقِيسْ ويَعْبَرْ
رُدِّي بَالَكْ
حْظِي الرّْكِيزَة
مَنْ سْنَانْ الْفَارْ
وحْبَالْ الْخَيْمَة
اوْتَادْ الْبَرّْ
رُدِّي بَالَكْ
دِيري كْمَامَة عْلَى فُمَّكْ
وصَفِّي مَاكْ
فشْرَابُو إِلَى مْطَرْ
دَفيتْ الدَمْعَة
عْلَى نَارْ غْريبَة
عْيَاتْ بالسْفَرْ
مْشَطْتْ رَاسي
عْلَى مْرَايَة
مَصْرُوعَة بْجَنّْ الْبَشَرْ
سْقِيتْ لَعْرَاسِي
بعْرَگْ الْمَحْنَة
ورْوِيتْ الشّْجَرْ
تْفَكَّرْتْ تَصْوِيرْتِي
مَحْبُوكَة بْضَوْ رَحْبَةْ الْفِكْرْ
شَمِّيتْ الظَّالَمْ
غَارَقْ فْكَاسُو لْسَاسُو حْفَرْ
دَرْتْ بالَوْصِيَّة
كَانَتْ حُلْمْ
فجْنَانْ غْلَّة وتْمَرْ
غْسَلْتْ يِدِيَّ
مَنْ خْطَاكْ
بْلا حَاجَة والْگلْبْ نْفَرْ
لُومْنِي يَا زَهْرِي
وحْرَگْ كَفِّي بْكَبْرِيتْ لا تَغْفَرْ
سَالُونِي وسَالُونِي
لا تْلُومُو مْدَادْ لَقْلُمْ
إِلَى غَابْ وحْضَرْ
طْلِيتْ الْحَنَّة عْدَاوَة
فوْجَهْ لَعْدُو
يَا رَبِّي تَسْتَرْ
هَزِّيتْ الرَّاسْ
فُوگْ كْتَافِي
يَاكْ أَنَا عَبْدْ حُرّْ
سَگِّيتْ الْكَلْمَة
بْمَا وَجْهِي والأَصْلْ جْذَرْ
آجِي دَابَا
هُرْبِي عَلْ الْحَطَّابَة
وَسْطْ الْغَابَة
زِينْ الفَعْلْ
سَاتْرَاهْ الضّْبَابَة
مَاشِي كَذَّابَة
الْخَيْرْ والصَّابَة
جَدّْ الْخَيْرْ مَا يْمُوتْ
لَحْبَقْ والتُّوتْ
للنَّاسْ لَخْيَارْ مَنْعُوتْ
الشّْمَاتَة عَشّْ عَنْكْبُوتْ
مَنْحُوتْ
غْريبْ فجْعَابْ الْمُكْحْلَة صَدَّاتْ
فْجُوفْ النَّفْسْ والْغَوْتْ
قْوَامْ حَالَكْ آخُويَا
رَاهْ كُلْشِي يْفُوتْ
نَادِيتَكْ آرِيحْتِي
آشْكُونْ انَا
آفِينْ نْكُونْ
بْلا شْطُونْ
حَقِّي صْلاةْ طَاهْرَة
نَفْسْ مْكَابْرَة
ظْلالْ غَافْرَة
جْفَانْ سَاهْرَة
بْحَقّْ الْمَكْتُوبْ
وغْرُوبْ الظَّلْ
عْلَى گْدَامْ الْوَگْفَة
سُؤَالْ الْبَسْمَة
جْوَابْ الدَّنْيَا سُؤَالْ
مَفْقُودْ..
وشْهُودْ الدَّنْيَا، شْهُودْ
لاخْرَة
وقَلَّةْ النِِّيَة غَادَة گُودْ
بْلا گُودْ
وسَعْدْ السّْعُودْ
الْمَنْكُودْ
نَادِيتَكْ آنَفْسِي
بْحْلِيبْ الْبَزُّولَة
للِّي رْضَعْتِي وفْطَمْتِي
بْتُوبْ الْمَلائِكَة
للِّي لْبَسْتِي وتْعَرِّيتِي
نَادِيتَكْ آرُوحِي
لْمْكَابْدَة جْرُوحِي
بْكَايَ ونُوحِي
بُوحِي وفُوحِي
بْكْلامْ مَجْدَامْ
سَاكنْ رُوحِي
سَمْعِي دَقَّاتْ قَلْبِي
يَعْفُو عْلِيكْ الله
سَگِّي النَّغْمَة
باوْتَارْ هَجْهُوجْ الْحَالْ
.. وطَرْبِي
طْفِي الصُّورَة
فْلُونْ الظَّلْمَة
.. سَرّْ مْخَبِّي
غَسْلِي گْفَاكْ
بْمَا شْتَاكْ
.. يَفْرَحْ گَلْبِي
شُرْبِي الضَّحْكَة
فكْفُوفْ يدِّيكْ
.. شُرْبِي
بْمْدَادْ الدَّمْعَة كَتْبِي
.. الشَّكْوى لْرَبِّي
صَارَحْتَكْ
بْرْجُوعْ لَمْسَافَرْ
لِيعْتُو..
وكِيْتُو..
الْحُگْرَة تْشَامِيرْ بْلا عْگَادِي
صَارَحْتَكْ
بْسْبُوعْ الْحَامْلَة
الشَبَّة والْحَرْمَلْ
رِيَحَةْ لَقْرُنْفَلْ
مْشَاگَةْ الزَّحْمَة نَعْنَاعْ بَرَّادِي
صَارَحْتَكْ
بْدْمُوعْ لِيتِيمْ
الْوَادْ الْمَسْكُونْ
الدَّمْ الْمَغْبُونْ
حَرْگُوسْ صْبَاحَكْ تْوَحَّشْ بْعَادِي
فَرّْقِي سْوَارْتَكْ..
سَارُوتْ.. سَارُوتْ
دْفُوفَكْ مَا تَسْمَعْ دَقَّانْ
نَارَكْ مَا فِيهَا دُخَّانْ
دْرَاعْ الْمَحْنَة
ذْبَالَتْ عْرُوقُو
صْبَرْ النَّخْلَة فْصْحَارِي
بالتّْمَرْ تْجُودْ
نَادِيتَكْ ونَادِيتَكْ
صَيْفَكْ خْرِيفْ
طْوَالَتْ رْيَاحُو
لْغَاكْ مَصْرُوعْ
بْنَارْ زَاهْرَة
غْلَبْهَا السَفُّودْ
بْشَدَّةْ لَقْلُمْ
بْهَزَّةْ لَگْدَمْ
بالْخَاوَة والدَّمْ
نَادِيتَكْ
فُكِّي حْزَامِي
تَخْمَامِي
وسْلامِي
حَنّْ لسْلامِي
حَنّْ فْيُومْ يَلْگَاكْ
وَاگْفَة عْلَى بَابِي
يَضْحَكْ صْوَابِي
ومَكْتَابِي
يَرْكَعْ بِينْ سْطُورْ كْلامِي
طَالَبْ
رَاغَبْ.. سْلامِي
ولا سْلامْ سِوى سْلامَكْ
ولا كْلامْ سِوَى كْلامَكْ
والْحَنَّة تْرَابْ گْدَامَكْ
غِيرْ تُوبِي يَرْجَعْ صْوَابَكْ
نْتُوبْ مْعَاكْ نْشَدّْ وْصَالَكْ
نَمْشِيوْ خَطْوَة خَطْوَة
والنَّخْوَة
عَلْ الزّْمَانْ إِلَى دْوَا
ورَاجَعْ حْسَابو بْسُؤَالْ الْبَارَحْ
وصَرْفْ الْگَرَّابْ
جْوَابُو
حْمُومْ لَخْدِيمَة وَشْمَة
الْمَهْرَازْ دَگّْ لَحْسَدْ فدْخَالُو
طَارَتْ غْبَارُو
ع لْعَيْنْ لْمَحْسَادَة
سَرْبِي.. زَرْبِي بالْخَطْوَة
نْهُرْبُو ع لْعَيْنْ
لَوْذَنْ سَمَّاعَة
غْبَارْ الْگَاعَة
دْرَاسْ الجْمَاعَة
يْصَلِّيوْ عْلَ النّْبِي كِيفْ الْعَادَة
سَرْبِي.. زَرْبِي بالْخَطْوَة
نْقَطْعُو الْوَادْ
شُوفِي لَعْيَالاتْ يْغَسْلُو فالصُّوفْ
الدَّزَة خَايْفَة مَنْ الْمَا
الْوَدْحَة دَگَّتْ صْبَاعْ الْعَزْبَة
وعَيْنْ الْوَادْ شْحَالْ بَارْدَة
سَرْبِي.. زَرْبِي بالْخَطْوَة
نْقَطْفُو الْوَرْدَة
هَا عَسَّاسْ الجْنَانْ
دَّاهْ النّْعَاسْ
شُوفِي الشّْجَرْ
اللُّوزْ والْمَشْمَاشْ
الْخُوخْ احْمَرْ والشَّهْدِيَة
فاغْصَانْ حَامْدَة
سَرْبِي.. زَرْبِي بالْخَطْوَة
نَّقْزُو السُّورْ
نْدخْلُو الْمَنْزَهْ
هَا قُبَّةْ سِيدِي.. هَا قُبَّةْ لالَّة
هَا الْعَرْسَة والرّْيَاضْ
الصّْوَانِي تَلْمَعْ
كِيسَانْ الْبَلارْ فُوقْ الْمَايْدَة
هَا سَلْهَامْ سِيدِي.. هَا قَفْطَانْ لالَّة
شُوفِي الْبَلْغَة صَفْرَة
شَرْبِيلْ لالَّة يَلْمَعْ
صَنْدُوقْ الْمُونَة
عُودُو مَنْ الْعَرْعَارْ
هَا الْخَنْجَرْ والسِّيفْ
عَدَّاكْ زِيفْ لالَّة يَدِّيهْ الرِّيحْ
ويْشُوفُوهْ الْحَصَّادَة
سَرْبِي.. زَرْبِي بالْخَطْوَة
نْشَگُّو الْفَدَّانْ
حَمُّصْ وفُولْ
گَمْحْ وشْعِيرْ
هَا بَلَّعْمَانْ حَاضِينَا
الكَلْكَازْ رِيحْتُو عْطَاتْ
والنَّاسْ جَايَّة وغَادَة
سَرْبِي.. زَرْبِي بالْخَطْوَة
نَمْشِيوْ لْغَابَة
هَا لَحْجَلْ والسَمَّانْ
هَا الشّْجَرْ عَالِي مْگَدَّرْ
والسّْلُوگِي تَابَعْ الصِيَّادَة
خَلِّينِي نَحْلَمْ
بِيَّامْ
نْسَاتْهَا ايَّامْ
بْلا سَبَّة بْلا سْبَابْ
مَالَكْ فَقْتِي؟
مْنَامْتِي شَافَتْ مْنَامْتَكْ
فغْيُومْ وسْحَابْ
دَفِّينِي بْعْرَگْ فْرَاشَكْ
صَوْتْ لَوْسَادَة
حِيَّاحْ لَحْلامْ
فْصَوْتْ غْرَابْ
سَوّْلِينِي بْكُبْرَانِيتَكْ
عْلَى فَالْ الْوَقْتْ
والزّْحَامْ
والسُّوسَة فالنَّابْ
سَوّْلِينِي عْلَى عْصَاةْ السَّارَحْ
نْعَاجُو وخَرْفَانُو
وكَلْبْ حَاضِيهَا عَلْ الدّْيَابْ
نَادِيتَكْ بْوَحْشَةْ لَبْعِيدْ
لا تْشَعْلِّي نَارِي
بْرَابوزْ حَدَّادْ
مَنْ الْهَنْدْ
مْصَدِّي لَجْعَابْ
نَهْدِيكْ عَقْلِي
نَهْدِيكْ هْبَالِي
ثوبْ لَهْدِيَّة رِيشْ النّْعَامْ
ولَحْمَامْ
فْرَاگُو خُّوتْ ونْسَابْ
يَاكْ أَنَا گَلْبِي صَافِي
كِيفْ يْحَافِي
كِيفْ يْجَافِي
كِيفْ يْقَلَّلْ لَحْيَا عْلِيكْ
والشِّيبْ غْرَسْ بْيَاضُو
فكْحَالْ رَاسِي مَكْتَابْ
كِيفْ نْآدِيكْ
وانْتِي منِّي
قْبَرْ واحَدْ فْرَاشْ الدّْوَامْ
يْقَلّْ التَّخْمَامْ
رَاحْتِي تْعَانَقْ رَاحْتَكْ
عْلَى سْطُورْ لَكْتَابْ
كِيفْ نْخَلِّي شَمْسِي تَغْرَبْ
وعَيْنِي مَا شَافَتْ شْرُوقْ شَمْسَكْ
زُرْقَةْ سْمَاكْ
مَحْجُوبَة بْأَلْفْ حْجَابْ وحْجَابْ
وَاسِيتَكْ وَقْتْ الضِّيقْ
والشَدَّة
مَلِّي تْخَلّْطَتْ لَوْرَاقْ
لَحْزَانْ فَاقَتْ
ودَّفْگَتْ سْرَابْ
حْفَا شَاقُورْ لَغْدَرْ
ومَنْجَلْ الشَرّْ
تْلَفْ فْلَحْصِيدَة
وقَلَّةْ الصّْبَرْ تْآدِي لَصْحَابْ
دِيرِي يْدِيكْ فِيدِيَ
عُگْدِيهُمْ بْكَلْمَة وَحْدَة
غَسْلِيهُمْ بْدَمْعَةْ الْمَلْگَى
عْلَى جَنْبْ الْبِيرْ والسَّاگْيَة
وعَطَّارْ الدَوَّارْ
وْطَى وشْعَابْ
غَطِّي سَرَّكْ بْسَرِّي
كَتْبِي حْرُوفْ مَسْرَارَة
دَفِّي السّْطَرْ
بْمْدَادْ قْلُمْ حْنِينْ
يَعْطِيكْ لَجْوَابْ
مَالَكْ عْنِيدَة؟ وعْنَادَكْ
صْخَرْ زَنْدِي
مَا يْطُوعْ مَا يْنَدِّي
مَا يَغْزَلْ مَا يْسَدِّي
حَطْبُو مَا يَگْدِي
مَا يْفُورْ كَسْكَاسُو
بقَفَّالْ مَجْرَابْ
مَالَكْ عْنِيدَة؟ وعْنَادَكْ
حْمَاقُو فْرَحْبَة بْعِيدَة
والتَّنْهِيدَة
بْرِيدْهَا عْلِيكْ
شْحَالْ دَقَّتْ مَنْ بَابْ
مَالَكْ عْنِيدَة؟ وعْنَادَكْ
فِرْعَوْنِي
عْنَادُو يْآدِيكْ
مَا يَغْفَرْ غِيرْ إِلَى مَا غَطَّاكْ بالتّْرَابْ
مَالَكْ عْنِيدَة؟ وعْنَادَكْ
مْقَصْ عْبِيدَاتْ الرّْمَى
يْدَزّْ لَقْصِيدَة
يَرْكزْ عَلْ الْمَايْدَة
وعْطَشْ الشُّوقْ مَا يَرْوِيهْ گَرَّابْ
مَالَكْ عْنِيدَة؟ وعْنَادَكْ
صَهْدْ شَرْگِي
عْجَاجَة عَمْيَة
هَبَّتْ فصْبَاحْ مْسَاكْ
مَا تَعْرَفْ صْوَابْ
كَلْمِينِي بْلُغَةْ الزَّرْوَاطَة
بْلُغَةْ أَحْ
بْلُغَةْ الْحَمْلَة
الْجَارْفَة خَفَّةْ الرّْجَلْ
واللّْسَانْ ثْقِيلْ
يْتَمْتَمْ.. رِيقُو ذَابْ
كَلّْمِينِي
بْخَطْوَاتْ الْعُكَّازْ
بمْسَامَرْ الْخَرَّازْ
بْجُوقْ الْحَرَّازْ
جُرْحْ الْمَهْمَازْ
وحْلِيبْ لَغْدَرْ مَالُو مَا رَابْ؟
كَلّْمِينِي ولا تْآدِينِي
بعْظَامْ مَجْهُولَة
بسْبُوبْ لَمْحَبَّة
بْمَشْيَةْ الْفَكْرُونْ
والزّْرِيبَة شْطَبْ مَا حَطْبُو حَطَّابْ
كَلّْمِينِي ورَكّْبِينِي
عْلَى گْرُونْ لَغْزَالْ
عْلَى صَوْتْ الْهَلالْ
وجْرِي عْلَى للِّي بَاعَكْ
دَلالْ
مَنْ سُوقْ الدّْلالَة
يَاكْ خَايْنْ وكَذَّابْ
كَلّْمِينِي بْسِيرَةْ الْحُبّْ
وكَلْمَةْ الْحُبّْ
فْتُوحْ لَحْلايْقِي
زْرُورَةْ الْوَالْدَة
عْلامْ ابْيَضْ
رُبْطَة دْيَالْ النَّعْنَاعْ
فْگَصْبَةْ گَصَّابْ
دَاوِينِي عَلْ لَفْرَاقْ
زَوّْرِينِي
بَخّْرِينِي
بالْعُودْ لَقْمَارِي
الجَّاوِي.. وحْصَلَبَانْ
عْرَگْ الْمَحْنَة صَالَحْ للشّْرَابْ
رُشِّينِي بْدَّمْ
الذّْبِيحَة حْلالْ
بعْسَلْ الشَّهْدَة
ووْرَگْ الكَالِيتُوسْ
عْرَاشُو طْوَالْ
بحْلِيبْ الْبَگْرَة
ضْرَعْهَا شْحَالْ حَلابْ
طْفِي حَرِّي
فْمَا زْهَرْ
طْفِي الجّْمَرْ
الزَّاهَرْ بْلُونْ احْمَرْ
فْوَادْ عَطْشَانْ
فبْحَرْ ضَمْآنْ
مَاهْ نْفَرْ بْلا سْبَابْ
هَزِّي هَمِّي
عْلَى جْنَاحْ الطَّيْرْ الْحُرّْ
عْلَى كْفُوفْ صْلاتِي
عْلَى ضَوْ شَمْعَاتِي
غْرِيبْ..
جَوَّالْ
شَارِي هْبَالُو بفْرَنْكْ
وگرْشْ مَثْقُوبْ مَصْلُوبْ
مْقَطَّعْ حْوَايْجُو
وَاكَلْ حَقُّو
مَنْ عْشُوبْ الْعَشَّابْ
دُگِّينِي بْلَبْرَا
فُكِّي الجَّرَة جَرْتَيْنْ
فُكِّي الْكُبَّة لَمْخَبّْلَة
كُبّْتَيْنْ
وخَيّْطِي برْضَاكْ
كْسَاتِي
غْطَا رَاسِي
وقَطّْعِي ظْفَارْ رَجْلِي
باللامَة والْمَنْشَارْ
وحَرْقِيهُمْ فوْجَهْ
عْدُو لَحْبَابْ
سَمّْرِي الصّْفِيحَة فْبَابِي
والدَفَّة تَحْلَمْ بْدَقَّةْ لَحْبِيبْ
بْلَمْسَةْ الزَّايْرْ
بْعِيدْ وقْرِيبْ
مَاسَحْ الصّْدَا مَنْ قْفَالُو
والسَّارُوتْ
يَفْرَحْ يْحُلّْ الْبَابْ
خَاوِينِي فالْعَشْرَة
دِيرِي الْمَلْحَة فالطّْعَامْ
دِيرِي سَعْدَكْ عْلَى سَعْدِي
كْتَفْ وَاحَدْ
يْهَزُّو لَحْمَلْ إِلَى ثْقَالْ
يْصَحُّو لَقْوَالْ
إِلَى خَطْأَتْ يُومْ لَحْسَابْ
خَاوِينِي بالْعَيْطَة
خَرْبُوشَة.. زَرْوَالَة.. لَكْرَيْدَة
الْمَرْسَاوِي
الْعَلْوَة سَبْعْ قْبَابْ
طَلْقِينِي حُرّْ
فُكِّي هْبَالِي
فُكِّي الْبَسْمَة
يْبَانُو سْنَانِي وضْرَاسِي
غَلَّةْ شْقَايَا
سْمِيَّة وكْنِيَّة
وبَصْمَةْ بَوَّابْ
سْقِينِي
كِيفْ مَا سْقَى النّْدَى
مَشْمُومْ الْوَرْدْ
كِيفْ مَا سْقَاتْ الشّْتَا لَرْضْ
وتْبَسَّمْ جُوفْهَا
تَرْجَعْ الصَّابَة بَعْدْ لَغْيَابْ
دَفِّينِي
فصْدَرْ لَمِّيمَة
وصْبَرْ النَّمْلَة فْشُقْ غْرِيبْ
وعْشَا لِيتِيمْ إِلَى طَابْ
مَالَكْ سْكَتِّي؟
دْوِي مْعَايَا.. رُدِّي عْلِيَّ
عَايْرِينِي
كَتْبِي عْلِيَّ
بْلَعْدُولْ والشّْهُودْ
الْفَاتْحَة سَرّْ لَكْتَابْ
أَنَا مْعَاكْ
وسَرّْنَا حْلاوَة
خَايْفْ لا يْعُودْ عْدَاوَة
يْنَسِّينِي فْلْخَاوَة
والْخُبْزَة فْطِيرَة
عْجِينَةْ لَعْگَزْ
مَا طِّيبْ طْيَابْ
بْغَيْتْ نْسُوّْلَكْ مَرَّة
بْسُؤَالْ وسُؤَالْ
شْكُونْ مْحَرّْشَكْ عْلِيَّ؟
شْكُونْ سَرَّجْ عَوْدَكْ؟
وتْبَوْرَدْ عْلِيهْ بْلا لْجَامْ؟
بْلا سَرْجْ.. بْلا سْنَاحْ
وبَارُودْ الْمُكَحْلَة
حَبّْ شْبَابْ
بْغَيْتْ نَفْهَمْ سَرّْ مَرْضِي
عْلَى فْرَاشْ مْرِيضْ
مَضْرُورْ فْرَحْبَةْ لَقْوَافِي
مَكْسُورْ الدّْرَاعْ
فعْگَابِي وجْبَالْ وشْعَابْ
خَلِّينِي نَعْشَقْ الزِّينْ
الزِّينْ يَاكْ فالدَّفْلَة وحَارْ
الزِّينْ يَاكْ فالْوَرْدْ
وشُوكُو دَگّْنِي فِيدِيَّا
والْخَالْ فالْخَدّْ
كْحَلْ
حَجْرَة كْرِيمَة
وحْرِيرْ الدُّودَة غَطَّاهَا بثْوَابْ
حْرَامْ تْكُونِي عْدُوّْتِي
وانْتِي مَنِّي
يَاكْ سُوَّلْتَكْ بْلَجْهَرْ
والشُّوقْ اكْبَرْ
حْضَرْ
فْلِيلَة كَانْ ظْلامْهَا حَرّْ
وشُومْ زْبَرْ
حُلْمْ غْرِيبْ
مَنْ اغْصَانْ احْلامِي عْذَابْ
نَادِيتَكْ.. نَادِيتَكْ
بمْسَايَا
بصْبَاحِي
بالْكَسْرَة والضَمَّة والفَتْحَة والسُّكُونْ
والشَدَّة عْلَى حْرُوفْ كْلامِي
يَاكْ طَالْ الْغِيَّابْ
نَادِيتَكْ.. ونَادِيتَكْ
بْطَلَّة مَنْ شُقّْ حْزِينْ
بالْمَكْتُوبْ عَلّْ الجْبِينْ
بْسُؤَالْ گَارَحْ
فِينْ وفِينْ؟
بْشُوفَة فْلَمْرَايَا
بْجُرْحْ تْرَابْ
خَلِّي صْوَابَكْ يَتْفَكَّرْ صْوَابُو
خَلِّي كَرْمُوسْ الْكَرْمَة يْنَدِّي حْلِيبُو
خَلِّي لُوكَرْ يْشَمّْ رِيحَةْ غْرِيبُو
خَلِّي الرَّحْمَة غَرْسْ
خَلِّي الْعَيْنْ تَبْكِي بالْحَسّْ
خَلِّي ظَلْ لَهْبِيلْ اخْرَسْ
ولُومِينِي
عَاتْبِينِي
بْمِّيهَةْ سَبْعْ امْوَاجْ
بْگَدِّيدَة مَالْحَة
بْخُبِّيرَةْ آجْرَادَة مَالْحَة
فِينْ كُنْتِي سَارْحَة؟
وسْرَحتِي بِيَّا فْدْرُوبْ
اللُّومَة
الفَلْگَة
مَشْطَةْ الْگَرْنْ
فِيلِيلْ الْحُگْرَة
شَرْجَمْ مَنْفِي
حْيُوطْ رَاشْيَة قْلِيلَةْ نَفْسْ
خَلِّي غَرْسْ صْبَاحِي
يْصَبَّحْ عْلِيكْ
خَلِّي قَنْدِيلْ لِيلِي
يْمَسِّي عْلِيكْ
خَلِّي الْغَابَة تَضْحَكْ مْعَ لُوطَى
ويَنْبَتْ الْغَرْسْ
خَلِّي السَّاگْيَة والْبِيرْ خُّوتْ
خَلِّي لَهْنَا فْالْخَاطَرْ مَنْحوتْ
خَلِّي الزَرِِّيعَة تَحْلَمْ
بْالتِّْرَابْ الْمَحْرُوثْ حَلْبَة وعْدَسْ
خَلِِّي لَشْفَايَفْ واللِّْسَانْ بَنَّة
جَرّْبِينِي
عْلَى كْفُوفْ الْمِيزَانْ
عْلَى سْوَالَفْ النَّسْوَانْ
عْلَى مَنْجَجْ اللَّعْبَانَة
مَطْلِي بالْحَنَّة
كَتْبِي اللُّوحَة
عَنْدْ الطَّالَبْ
بْلُونْ زَعْفْرَانْ الْحُرّْ
بصْمَقْ الدّْوَايَة
بمْدَادْ شْقَرْ
ولَحْصِيرَة مَنْ الدُّومْ كَبْرَتْ مْعَايَا
مَنْ الصّْغُرْ
.. مَحْنَة
نَقْرَا اللُّوحَة بْلَجْهَرْ
نَمْحِيهَا بالصَّلْصَالْ
ومَحّْ الْبَيْضَة
غْرَامَة.. هْدِيَّة
بْلا شْقُوفْ الْفَتْنَة
جْرِي عْلِيَّا
عْلَى جْنَابْ الْحُرِّيگَة
فْضْرَگْ مَنْسِي
فْغَابَة مَسْكُونَة
فْرَوْضَة مَهْجُورَة
ودَفْنِينِي نَتْهَنَّا
مَالَكْ عْنِيدَة؟
وعْنَادَك مْلَقَّمْ
فْحَوْضْ النَّعْنَاعْ والشِّيبَة
وعْنَادَكْ مْلَثَّمْ
فْصْحَارِي غْرِيبَة
وعْنَادَكْ مْعَلَّمْ
يْخَيَّطْ لَهْمُومْ بْسْبِيبَة
خَلانِي نَتْسَنَّى
مَالَكْ بَكِّيتِي الشَّمْعَة
فْبِيتْ مَظْلامْ
صَافْحِينِي
بْسُؤَالْ غَدَّا
بْجْوَابْ الْبَارَحْ
بْمَكْتُوبْ مْقَدَّرْ
بْسَرّْ هَاذْ لَقْصِيدَة
بْسَرّْ گْرَانِي
بْطَعْنَةْ الْغَفْلَة
فْحْرُوفْ لَمْحَنَّة
خُونِي الْعَاهَدْ
حْرَامْ إِلَى خَنْتِيهْ
عْطِينِي بْلَگْفَا
نْسَمِّي عْلِيكْ
فْلْيَالِي
شْتَاهَا تَبْرُورِي
وبْرَقْ لْحَانُو تَتْغَنَّى
كُونِي نَحْلَة
كُونِي شَهْدة
كُونِي عْسَلْ
خَاتَرْ.. يْشَافِي.. يْدَاوِي
وجْنَاحْ النَّحْلَة
يْفَرَّشْ فْرَاشْ لَهْنَا
كُونِي حْدِيثِي
كُونِي دْرَاعِي لِيمِينْ
كُونِي غرْبَالْ دْگِيگِي
كُونِي مَلْحَةْ طْعَامِي
وغْطَايَا لَحْنِينْ
بِيهْ يَدْفَى فْرَاشِي
صَالْحِينِي
بْقُرْشَالْ دَادَة
ومِّي لالَة
والزّْنَيْگَة
ولْبَنْ الشَّكْوَة
صَوْتْ الْحَصَّادَة
زْرَعْ فْلَخْنَاشِي
رَاضِينِي بالنَّعْمَة
بالْبَسْمَة
بالنَّغْمَة
بكْلِيمَة تْجَبَّرْ الْعُودْ الرَّاشِي
سَكّْتِي حْمَاقِي
بالْمَلْحُونْ الشَّادِي
بْزْهَرْ عْرَاشِي
گُولِي الله يَصْلَحْ
الْخَيْرْ مْرَحْ
لَگْلِيبْ فْرَحْ
يَبْرَى الْجُرْحْ مَنْ لَخْرَافَة
خَلِّي عَلْتِي
تْصَاحَبْ دْوَاكْ تَتْشَافَى
خُودِي عَلّْتِي
لَدْوَاكْ يَتْعَافَى
شَمِّينِي شَمَّةْ لَخْزَامَى والرِّيحَانْ
يَعْطَسْ هْبَالِي
سَرْحِينِي دَمّْ فْعْرُوقَكْ
وعَزْفِي مَوَّالْ
غِيوَانِي بُوهَالِي
حَرْقِي ظَلّْ عْنَادَكْ
بْنَارْ بَارْدَة
بْثْقُلْ لَجْبَالْ
بْجْرَافْ مَشْرَارَة
ضُرّْ سْعَالِي
تُوبِي
فْدْقِيقَة غَضْبَانَة
تُوبِي
فْسْوِيعَة مَضْيُومَة
فْنْهَارْ خَايَفْ مَنْ لِيلُو
تُوبِي
عْلَى صْلاةْ اوْقَاتِي
عْلَى نَفَّارْ سْحُورِي
عْلَى گَمْرَة هَجَّالَة
عْلَى حْرُوفْ سْمِيّْتِي
عْلَى خْلِيلْ نْسَاهْ خْلِيلُو
تُوبِي
عْلَى رْگَادْ الشَّاقِي
عْلَى دَمْعَةْ لِيتِيمْ
عْلَى جُوجْ فَرْقَتْهُمْ الْعَيْنْ
بْدْمُوعْ يْسِيلُو
دُقِّي بَابْ السَّتْرَة
ولا تْغِيضَكْ
ولا تْغِيضَكْ
ولا تْغِيضَكْ
كَلْمَةْ شْكُونْ
فُكِّي لَكْبَالَة
مَنْ الدّْرَة
وسْگِيَّةْ الْحَامْلَة
بَالْ مَشْطُونْ
شُوفِي شْحَالْ
طْوَالَتْ السّْطُورْ
ولا سْطَرْ يَشْبَهْ سْطَرْ
شُوفِي لَفْعَالْ
مَدْفُونَة فقْبُورْ
ولا قْبَرْ يَشْبَهْ قْبَرْ
وخَلِّي قَبْرَكْ يَشْبَهْ لَفْعَالُو
أَنَا خْدِيمَكْ
نْطِيعْ شُوفْتَكْ
فمْرِيرَة
ومَلْگَى الطُّرْگَانْ
أَنَا خْدِيمَكْ
نْسَاعَفْ هْبَالَكْ
بصْبَرْ السَّارَحْ الْعَطْشَانْ
أَنَا خْدِيمَكْ
نْغْرَسْ اسْرَارَكْ
فْجْنَانْ بْلا عُنْوَانْ
حَدْرِي رَاسَكْ
وطَلْقِي سَالْفَكْ يَتْحَيَّرْ
هَا عِيسَاوَة
هَا گْنَاوَة
هَا بْخُورْ لْمَجْمَرْ
خُرْجِي مَنِّي..
خُرْجِي مَنِّي..
خُرْجِي مَنِّي..
هَا لَفْجَرْ
گَالْ الله أَكْبَرْ
خَلِّي صْلاتِي
لَذْنُوبِي تَغْفَرْ
خَلِّي سْكَاتِي
يْبُوحْ بْلَجْهَرْ
خَلِّي الْعَيْنْ
تَسْعَدْ بظْلالْ لَشْفَرْ
خَلِّي حْرُوفْ لَقْصِيدَة
تَفْرَحْ عَلْ السّْطَرْ
خَلِّي السَّامَعْ
يَسْمَعْ ويَعْذَرْ.